वीरगन्ज । स्थानीय तह उपनिर्वाचनका लागि निर्वाचन आयोगले निर्वाचन अधिकृत नियुक्त गरेको छ ।
१६ मंसिरमा हुने उपनिर्वाचनका लागि ३२ जना जिल्ला न्यायाधीश, ६ जना राजपत्राङ्कित कर्मचारीलाई तोकिएको आयोगले जानकारी गराएको छ ।
सप्तरीको डाक्नेश्वरी नगरपालिका वडा नम्बर १ र ४ मा अध्यक्षका लागि हुने निर्वाचनका लागि जिल्ला अदालत सप्तरीका न्यायाधीश दीपककुमार दाहाललाई तोकिएको छ ।
यसैगरी धनुषाको धनुषाधाम नगरपालिका वडा नम्बर १ मा धनुषा जिल्ला अदालतका न्यायधीश चुरामन खडकालाई नियुक्त गरिएको छ ।
यस्तै महोत्तरीको रामगोपालपुर नगरपालिका–२ मा अध्यक्षका लागि हुने निर्वाचनका लागि महोत्तरी जिल्ला अदालतका न्यायाधीश राजकुमार कोइरालालाई मुख्य निर्वाचन अधिकृत तोकिएको छ ।
त्यसैगरी रौतहटको ईशनाथ–७ मा रौतहट जिल्लामा अदालतका न्यायधीश मनोज केसी, राजपुर नगरपालिका–६ का रौतहट जिल्ला अदालतका स्रेस्तेदार उद्धवकुमार ढोडारीलाई तोकिएको छ ।
रौतहटकै गढीमाई नगरपालिका वडा नम्बर ८ मा हुने निर्वाचनका लागि जिल्ला सरकारी वकिल कार्यालय रौतहटका जिल्ला न्यायधिवक्ता मुहम्मद मुन्नालाई निर्वाचन अधिकृतको जिम्मा दिइएको छ ।
३० कात्तिकमा सम्बन्धित स्थानमा निर्वाचन अधिकृतको कार्यालय स्थापना हुने आयोगले जनाएको छ । दुई जिल्लामा जिल्ला समन्वय समितिको प्रमुख सहित १६ मंसिरमा निर्वाचन हुँदैछ ।
