वीरगन्ज । पर्सा प्रहरीले भारी परिमाणमा लागु औषधसहित एक जनालाई पक्राउ गरेको छ । प्रहरीले वीरगन्ज महानगरपालिका वडा नम्बर १४ गण्डक चोकबाट लागु औषधसहित एक जनालाई पक्राउ गरेको हो ।
पक्राउ पर्नेमा वीरगन्ज महानगरपालिका वडा नम्बर २५ निवासी २३ वर्षका राज महम्मद देवान रहेका प्र्रहरीले जनाएको छ ।
विशेष सूचनाको आधारमा वीरगन्जबाट काठमाण्डौँतर्फ जाँदै गरेको बागमती प्रदेश ०३–००१ ख २६६६ नम्बरको सार्वजनिक बसलाई रोकेर जाँच गरेको थियो । सोही क्रममा बसमा सवार देवानले सेतो बोराभित्र म्याटले फोल्ड गरेको ब्लांकेटभित्र कालो प्लाष्टिकमा लुकाई छिपाइ राखेको अवस्थामा लागु औषध फेला परेको हो ।
उनको साथबाट नुरफिन ११९५ पिस, डाइजेपाम १२०० पिस, फेनारगन ११८५ पिस गरी जम्मा ३५८० एम्पुल लागु औषध फेला परेको प्रहरी नायब उपरीक्षक दीपक भारतीले बताए ।
पक्राउ परेकालाई लागु औषधसम्बन्धि कसूरमा थप अनुसन्धान भइरहेको पर्सा प्रहरीले जानकारी दिएको छ ।
