काठमाण्डौँ । कोशीका निवर्तमान मन्त्री लीलावल्लभ अधिकारी निलम्वनमा परेका छन् । उनलाई नेपाल एमालेले सङ्गठित सदस्यबाट निलम्बित गरेको हो ।
शनिबार बसेको एमाले कोशी प्रदेशको बैठकले उनलाई आरोपको अन्तिम निरुपण नभएसम्मका लागि पार्टीको कुनै तहमा रहन नपाउने गरी निलम्बित गरेको हो ।
एमाले कोशी प्रदेशका अध्यक्ष घनश्याम खतिवडाले अधिकारीलाई राष्ट्रिय महाधिवेशन प्रतिनिधि परिषद् सदस्य तथा नेकपा एमालेको सङ्गठित सदस्यताबाट समेत निलम्बन गरिएको बताए ।
जापान भ्रमणका विषयमा विवाद भएपछि मन्त्रीबाट उनले राजीनामा दिएका थिए । अधिकारी एमालेको तर्फबाट मोरङ जिल्लाको प्रतिनिधिसभा निर्वाचन क्षेत्र नं २ को प्रदेशसभा निर्वाचन क्षेत्र (ख) बाट निर्वाचित सदस्य हुन् ।
उनी प्रदेश सरकारका आन्तरिक मामिला तथा कानूनमन्त्रीको हैसियतमा केही दिन अगाडि वैदेशिक भ्रमणका लागि जापान गएका थिए । उनले आवश्यक मापदण्ड तथा प्रक्रियाहरूसमेतको बेवास्ता गरी पदीय मर्यादाविपरीत जापानको भ्रमण गरेपछि पार्टी र संसदीय दलको तर्फबाट मन्त्री पदबाट राजीनामा दिएका थिए ।
उनीमाथि मानव तस्करीको गम्भीर आरोप लागेको छ । खतिवडाले उनको जापान भ्रमण प्रकरणले नेकपा एमालेमाथि समेत गम्भीर आरोप लगाउँदै अन्य गम्भीर प्रकृतिका अनियमितताका घटनाहरूलाई ढाकछोप वा हल्का बनाउने प्रयास भइरहेको कुराले पार्टीको गम्भीर ध्यानाकर्षण भएको बताएका छन् ।
