वीरगन्ज । पर्सामा प्रहरीले दुई राउन्ड हवाइ फायर गरेर ३३ किलो गाँजासहित तीनजनालाई पक्राउ गरेको छ ।
पक्राउ पर्नेमा पटेर्वासुगौली गाउँपालिका–१ मलाही टोलका नन्दलाल सहनी, महेश सहनी र भुटी सहनी रहेका छन् ।
जिल्ला प्रहरी कार्यालय पर्साका प्रवक्ता डीएसपी चक्रबहादुर मल्लका अनुसार आइतबार राति मलाही टोलमा अवैध रूपमा गाँजाको कारोबार भइरहेको सूचना पाएपछि प्रहरी टोली परिचालन गरिएको थियो ।
प्रहरी टोलीले शंकास्पद गतिविधि देखिएपछि जाँच अघि बढाउने क्रममा तीनैजना गाँजा लिएर भाग्न खोजेका थिए ।
उनीहरूलाई नियन्त्रणमा लिन प्रहरीले दुई राउन्ड हवाइ फायर गरेको डीएसपी मल्लले बताए ।
प्रहरीले उनीहरूको साथबाट ३३ किलो गाँजा बरामद गरेको जनाएको छ ।
पक्राउ परेका तीनैजनालाई जिल्ला प्रहरी कार्यालय पर्साको हिरासतमा राखेर लागुऔषधसम्बन्धी कसुरमा थप अनुसन्धान भइरहेको प्रहरीले जनाएको छ ।
