सिमरा । बाराको जितपुर सिमरा उपमहानगरपालिकामा ३ वर्षीया गरिमा चौधरीको बलात्कारपछि हत्या भएको घटनाको अनुसन्धानका क्रममा प्रहरीले थप एक जनालाई पक्राउ गरेको छ ।
पक्राउ पर्नेमा जितपुर सिमरा उपमहानगरपालिका निवासी प्रदीप खड्का रहेका छन् ।
उनी विद्यार्थी रहेको प्रहरीले जनाएको छ ।
जितपुर सिमरा उपमहानगरपालिका–१ मा भदौ २ गते गरिमा मृत अवस्थामा फेला परेकी थिइन् ।
घरबाट हराएको तीन दिनपछि उनको शव फेला परेको थियो ।
प्रहरीको अनुसन्धानबाट गरिमाको बलात्कारपछि हत्या भएको निष्कर्ष निकालिएको छ ।
घटनामा संलग्न व्यक्तिहरूको पहिचान तथा भूमिकाबारे प्रहरीले अनुसन्धान अघि बढाइरहेको जनाएको छ ।
जिल्ला प्रहरी कार्यालय बाराका डीएसपी मीनबहादुर घलेका अनुसार घटनाको अनुसन्धानका क्रममा अहिलेसम्म ९ जनालाई नियन्त्रणमा लिइएको छ ।
पछिल्लो पटक पक्राउ परेका खड्कासहित घटनामा अनुसन्धानका लागि ९ जना प्रहरी नियन्त्रणमा रहेको उनले बताए ।
घटनामा पक्राउ परेकाहरूको संलग्नता र भूमिकाबारे थप अनुसन्धान भइरहेको प्रहरीले जनाएको छ ।
