वीरगन्ज । पर्सा प्रशासनले वीरगन्ज महानगरपालिकाका विभिन्न क्षेत्रमा निषेधाज्ञा जारी गरेको छ।
सम्भावित सुरक्षा संवेदनशीलतालाई मध्यनजर गर्दै जिल्ला प्रशासन कार्यालय पर्साले बिहीबार साँझ ५ बजेदेखि लागू हुने गरी निषेधाज्ञा जारी गरेको हो।
प्रमुख जिल्ला अधिकारी भोला दाहालद्वारा जारी सूचनाअनुसार वीरगन्ज महानगरभित्र पूर्वमा प्रतिमाचोक, पश्चिममा तिलावे पुल, उत्तरमा गण्डक नहर र दक्षिणमा शंकराचार्य गेटसम्मको क्षेत्रलाई निषेधाज्ञा लागू गरिएको क्षेत्र तोकिएको छ।
प्रशासनले उक्त क्षेत्रमा शान्ति–सुरक्षा कायम राख्न र कुनै पनि अप्रिय घटना हुन नदिन निषेधाज्ञा लागू गरिएको जनाएको छ।
प्रशासनले सर्वसाधारणलाई निषेधाज्ञाको पूर्ण पालना गर्न आग्रह गर्दै आदेश उल्लङ्घन गर्ने जो–कोहीमाथि प्रचलित कानुनअनुसार कारबाही गरिने चेतावनी दिएको छ।
