काठमाण्डौं । इरानले रिहा गरेसंगै अमृत झालाइ स्वदेश फर्काउन पहल थालिएको छ ।
परराष्ट्र मन्त्रालयले एक विज्ञप्ति जारी गर्दै उनलाई नेपाल ल्याउन पहल थालिएको जानकारी दिएको हो ।
विज्ञप्तिमा झाको रिहाइका लागि स्थानीय अदालतबाट आदेश भएको भन्ने खबर तेहरानस्थित नेपाली अनररी कन्सुल जनरलमार्फत अनौपचारिक रूपमा प्राप्त भएको जनाएको छ ।
साथै, सो आदेशको विस्तृत विवरण उपलब्ध गराउन र झालाई आवश्यक प्रकृया पूरा गरी नेपाल फर्काउनका लागि तेहरानस्थित नेपाली अनररी कन्सुल जनरल र नेपाली राजदूतावास दोहाबाट पहल जारी राखिएको विज्ञप्तिमा जनाइएको छ ।
इरानको नियन्त्रणमा रहेका ३३ वर्षीय नेपाली युवा झा बुधबार रिहा भएका थिए ।
