वीरगन्ज । विदेशमा धन कमाउने सपना बोकेर गएका नेपाली युवाहरूका लागि वैदेशिक रोजगारी एउटा कहालीलाग्दो नियति बन्दै गएको छ।
पछिल्लो एक महिना (साउन)को तथ्यांकले यो पीडाको भयावह चित्र प्रस्तुत गरेको छ। त्रिभुवन अन्तर्राष्ट्रिय विमानस्थल भन्सार कार्यालयका अनुसार, साउन महिनामा मात्रै १७४ जना नेपालीको शव विदेशबाट नेपाल ल्याइएको छ।
यो संख्याले प्रत्येक दिन सरदरमा ४ देखि ५ जना नेपालीको विदेशमा मृत्यु भइरहेको देखाउँछ। कुवेत, मलेसिया, साउदी अरेबिया, दक्षिण कोरिया, कतारलगायतका देशबाट यी शवहरू ल्याइएको हो। परिवारलाई सुखी जीवन दिने आशामा घर छाडेर गएका यी युवाहरू अन्ततः बाकसमा फर्किएका छन् र उनीहरूको सपना अधुरो नै रहेको छ।
वैदेशिक रोजगार बोर्डको तथ्यांक अनुसार, आर्थिक वर्ष २०८१–८२ मा वैदेशिक रोजगारीमा रहेका १,२५५ जनाको मृत्यु भएको थियो। यो संख्या बोर्डबाट आर्थिक सहायता प्राप्त गरेकाहरूको मात्र हो। प्रहरीको तथ्यांकमा भने यो संख्या अझै बढी छ। प्रहरीले मुचुल्का उठाएर परिवारलाई बुझाएका शवको संख्या १,४०१ रहेको छ। अघिल्लो आर्थिक वर्ष २०८०–८१ मा त यो संख्या १,४५५ पुगेको थियो।
वैदेशिक रोजगारीले देशको अर्थतन्त्रमा ठूलो योगदान दिए पनि, यसका सामाजिक र मानवीय मूल्यहरू भने निकै महँगो साबित भइरहेका छन्।
