वीरगन्ज । सामाजिक एकता र आपसी समझदारी बढाउने उद्देश्यले वीरगन्जमा सामुदायिक प्रहरी पदाधिकारी, कर्मचारी र उद्योगी–व्यवसायीबीच एक मैत्रीपूर्ण फुटबल खेल सम्पन्न भएको छ।
कुशेऔंसी अर्थात् बुबाको मुख हेर्ने दिनको अवसरमा आयोजित यो खेलले समुदाय र सुरक्षाकर्मीबीचको सम्बन्धलाई अझ प्रगाढ बनाएको छ।
ग्रीन सिटी सामुदायिक प्रहरी सेवा केन्द्र र ग्रीन सिटी सामुदायिक सेवा केन्द्र आदर्श नगर, पर्साको संयुक्त आयोजनामा भएको यस खेल वीरगन्ज महानगरपालिका–१० स्थित आदर्श रंगशालामा सम्पन्न भयो। खेलको मुख्य उद्देश्य सहकार्यको भावना विकास गर्नु र आपसी विश्वास बढाउनु रहेको थियो।
खेल हेर्नका लागि विभिन्न क्षेत्रका विशिष्ट व्यक्तिहरूको उपस्थिति थियो, जसले कार्यक्रममा थप उत्साह थपेको थियो। कार्यक्रममा जिल्ला प्रशासन कार्यालय पर्साका प्रमुख गणेश अर्याल, जिल्ला प्रहरी कार्यालय पर्साका प्रहरी प्रमुख एसपी गौतम मिश्र, उद्योग वाणिज्य संघ वीरगन्जका अध्यक्ष हरि गौतम र वीरगन्जस्थित भारतीय दूतावासका राजदूत डी.एस. मिना लगायतका अतिथिहरूको उपस्थिति थियो।
मैत्रीपूर्ण खेलमा ग्रीन सिटी सामुदायिक प्रहरी सेवा केन्द्र र ग्रीन सिटी सामुदायिक सेवा केन्द्र आदर्श नगरको टोली विजयी भएको थियो। यस खेललाई केवल जित र हारको रूपमा नभई, समुदाय र प्रहरीबीचको सम्बन्ध सुधारका लागि एउटा सकारात्मक कदमको रूपमा हेरिएको छ।
ग्रीन सिटी सामुदायिक प्रहरी सेवा केन्द्र तथा ग्रीन सिटी सामुदायिक सेवा केन्द्र आदर्श नगरका अध्यक्ष जय प्रकाश खेतानको नेतृत्वमा सफलतापूर्वक सम्पन्न भएको यस कार्यक्रमले आगामी दिनमा पनि यस्ता पहलहरूलाई निरन्तरता दिने सन्देश दिएको छ। यसले समुदायका सदस्यहरू र सुरक्षाकर्मीहरूलाई एकै ठाउँमा ल्याएर सौहार्दपूर्ण वातावरण सिर्जना गर्न मद्दत गरेको छ।
