वीरगन्ज । वीरगन्ज महानगरपालिकाका पूर्वमेयर विजय कुमार सरावगीले नेकपा एमाले परित्याग गरेको घोषणा गरेका छन् ।
बिहीबार अबेर राति सामाजिक सञ्जाल फेसबुकमार्फत स्टाटस लेख्दै सरावगीले एमालेको साधारण सदस्यसमेत नरहने गरी पार्टीका सम्पूर्ण जिम्मेवारी त्यागेको घोषणा गरेका हुन् ।
‘आजको मितिदेखि म नेकपा एमालेको साधारण सदस्य नरहने गरी सम्पूर्ण जिम्मेवारी परित्याग गरेको छु,’ उनले फेसबुकमा लेखेका छन् ।
यसैबीच एमाले परित्याग गरेको घोषणा गरेकै दिन सरावगी राष्ट्रिय स्वतन्त्र पार्टी (रास्वपा)मा प्रवेश गरेको तथ्यसमेत बाहिरिएको छ ।
रास्वपामा उनको नाममा पार्टी सदस्यता आईडीसमेत कायम रहेको पाइएको छ ।
रास्वपामा सरावगीको नाममा ‘पीआरएस १ ख ०००४३५७७६’ सदस्यता आईडी रहेको विवरण सार्वजनिक भएको हो ।
सरावगी यसअघि २०७८ सालमा जनता समाजवादी पार्टी (जसपा) परित्याग गरी नेकपा एमालेमा प्रवेश गरेका थिए ।
एमालेबाट २०७९ को स्थानीय तह निर्वाचनमा वीरगन्ज महानगरपालिकाको मेयरमा उम्मेदवार बनेका उनी राजेशमान सिंहसँग पराजित भएका थिए ।
