वीरगन्ज । सवारी दुर्घटना हुँदा मकवानपुरमा ८ जना घाइते भएका छन् । मनहरी गाउँपालिका वडा नम्बर ६ डिपार्टमा सवारी दुर्घटना हुँदा उनीहरु घाइते भएका हुन् ।
शनिबार दिउँसो पूर्व पश्चिम सडकखण्डमा वीरगन्जबाट चितवनतर्फ जाँदै गरेको बागमती प्रदेश ०१–०२६ च ५२५० नम्बरको स्कारपीयो र चितवनबाट हेटौँडातर्फ आउँदै गरेको बा १६ च ८३२४ नम्बरको कार एकापसमा ठोक्किएको थियो ।
घटनाको जानकारी पाएलगत्तै पुगेको इलाका प्रहरी कार्यालय मनहरीको टोलीले घाइतेहरुको उद्दार गरेर उपचारका लागि पठाएको छ । दुर्घटनामा परेका सबैको अवस्था गम्भिर रहेको मकवानपुरका डिएसपी श्यामु अर्यालले बताए ।
उनका अनुसार गम्भिर घाइते भएकाहरुलाई उपचारका लागि चितवन पठाइएको छ । घटनाबारे आवश्यक अनुसन्धान भइरहेको जिल्ला प्रहरी कार्यालय मकवानपुरले जनायो ।
