वीरगन्ज । लागू औषध सेवन गरी सवारी चलाएको आरोपमा तीन जना पक्राउ परेका छन् । ट्राफिक प्रहरी कार्यालय हेटौँडा र जिल्ला प्रहरी कार्यालय मकवानपुरबाट खटिएको संयुक्त प्रहरी टोलीले उनीहरुलाई पक्राउ गरेको हो ।
हेटौँडा–११ थाना भर्याङस्थित पुर्व पश्चिम लोकमार्ग सडकखण्डमा जिल्ला जनस्वास्थ्य कार्यालय मकवानपुर र सीएमसी चुरेहिल अस्पतालबाट खटिएको प्राविधिक टोलीले सवारीहरु रोकेर ड्रक्स टेस्ट किटबाट चालकहरुको स्वास्थ्य जाँच गरेका थिए । सोही क्रममा ना ६ ख ३१२४, ना. ६ ख. १७२९ र ना ४ ख ५१११ नम्बर सवारी चालकहरुले लागू औषध सेवन गरेको पाइएको डिएसपी श्यामु अर्यालले जानकारी दिए ।
उनका अनुसार पक्राउ पर्नेहरुमा सर्लाही हरिवन–७ का अनराज कार्की, हेटौँडा–८ बस्ने बिक्रम थापा र मनहरी–९ बस्ने अशोक थोकर रहेका छन् ।
पक्राउ परेकाहरुमाथि जिल्ला अदालत हेटौँडाबाट ५ दिनको म्याद थप गरी आवश्यक अनुसन्धान भईरहेको मकवानपुर प्रहरीले जानकारी दिएको छ ।
