वीरगन्ज । लागू औषध इन्जेक्सनसहित बाराबाट एक जना महिला पक्राउ परेकी छन् ।
पक्राउ पर्नेमा रौतहटको कटहरिया नगरपालिका वडा नम्बर ७ बस्ने २१ वर्षकी मुस्कान दास छिन् । विशेष सूचनाको आधारमा प्रहरीले उनलाई जितपुरसिमरा उपमहानगरपालिका–१ पथलैया चोकबाट पक्राउ गरेको जनाएको छ ।
प्रहरी चौकी पथलैयाबाट खटिएको टोलीले गौरबाट काठमाण्डौँका लागि छुटेको बा प्र ०१–००६ ख ५१५९ नम्बरको यात्रुवाहक बस रोकेर जाँच गरेको थियो । सोही क्रममा बसको डिक्कीमा लुकाइछिपाइ लैजादैँ गरेको अवस्थामा लागू औषध बरामद भएको बारा प्रहरीका डिएसपी प्रकाश सापकोटाले बताए ।
उनका अनुसार प्रहरीले लागू औषध इन्जेक्सनहरु नुर्फिन १२ सय पिस, डाइजेपाम १२ पिस र फेनारगन १२ पिस गरी ३६०० पिस फेला पारेको हो ।
पक्राउ परेकी महिलामाथि आवश्यक कानूनी प्रक्रिया अघि बढाइएको जिल्ला प्रहरी कार्यालय बाराले जनायो ।
