वीरगन्ज । बारामा प्रहरीलाइ नै गोली हानी हत्या गरेको घटनामा संलग्न रहेको आरोपमा प्रहरीले दुइजनालाई पक्राउ गरेको छ ।
गएको शनिवार भएको प्रहरी हत्या प्रकरणमा संलग्न रहेको आशंकामा बारा प्रहरीले दुइजनालाई पक्राउ गरेको प्रहरी स्रोतले जनाएको हो । जितपुर सिमराको एरियाबाट दुबैजना आरोपितलाई पक्राउ गरिएको बारा प्रहरी स्रोतले जानकारी दिएको छ ।
पक्राउ परेकाहरुसंग विशेष सोधपुछ चलिरहेकोले नाम र ठेगाना गोप्य राखिएको प्रहरी स्रोतको भनाइ छ । आज साँझसम्म वा भोली पत्रकारसम्मेलन गरेर आरोपितलाई सार्वजनिक गर्ने प्रहरीको तयारी रहेको जनाइएको छ ।
गएको शनिवार विहान प्रहरीको भान्से राजकुमार रुम्बा कारभित्र मृत भेटिएका थिए । शंकास्पद मृत्यु भएको रुम्बाको पोष्टमार्टम रिपोर्टमा गोली प्रहारबाट हत्या गरिएको खुलासा भएको थियो ।
उनको इलाका प्रहरी कार्यालय सिमरामा दरबन्दी थियो । तर हाल उनी एयरपोर्टको सुरक्षागार्डमा कार्यरत थिए । प्रहरी स्रोतका अनुसार यो घटनामा अहिलेसम्म ४/५ जना शंकास्पद व्यक्तिहरुलाई नियन्त्रणमा लिएर सोधपुछ भइसकेको छ ।
