सर्लाही । खाना पकाउने क्रममा आगोले पोलेर एक जना महिलाको मृत्यु भएको छ ।
सर्लाहीको ईश्वरपुर नगरपालिकामा खाना पकाउने क्रममा आगोले पोल्दा एक जना महिलाको मृत्यु भएको हो ।
मृत्यु हुनेमा नगरपालिकाको वडा नम्बर ६ झन्झट टोल बस्ने ३८ वर्षीया नैमुन खातुन रहेकी प्रहरीले जनाएको छ ।
गत कार्तिक २५ गते बिहान आफ्नै घरमा खाना पकाउने क्रममा सुपर कम्पनीको ग्यास सिलिन्डरबाट अचानक ग्यास लिक भएर आगो सल्किएको थियो ।
आगो सल्किन गई आगलागी हुँदा नैमुनको छातीदेखि तलको भाग ७० प्रतिशत तथा उनकी छोरी १९ वर्षकी आशो खातुनको दुवै हात १५ प्रतिशत जलेको थियो ।
आगोले पोलेर घाइते भएका दुवै जनालाई गोदावारी हेल्थ केयर बयलबासमा सामान्य उपचारपछि थप उपचारका लागि वर्ण केयर अस्पताल किर्तिपुर पुर्याइयो ।
तर अस्पतालका चिकित्सकले उपचार नहुने भन्दै उनलाइ फर्काइ दिएका थिए । उनलाई पून: भरतपुर अस्पताल पुर्याइ उपचार गर्ने क्रममा उनको आज मृत्यु भएको सर्लाही प्रहरीले जनाएको छ ।
नैमुनकी छोरी आशो भने उपचारपछि डिस्चार्ज भइ घर फर्किएकी सर्लाहीका डिएसपी दीपक श्रेष्ठले बताए ।
