बारा । बाराबाट प्रहरीले ७ जना फरार प्रतिवादीलाई पक्राउ गरेको छ । विशेष सूचनाको आधारमा प्रहरीले उनीहरुलाई लुकिछिपी बस्दै गरेको अवस्थामा पक्राउ गरेको हो ।
जिल्ला अदालत बाराबाट विभिन्न मुद्दामा कैदा तथा जरिवाना सजाय पाएपश्चात फरार भएकाहरुलाई पक्राउ गरिएको प्रकाश सापकोटाले जनाए । उनका अनुसार पक्राउ पर्नेहरुमा पाँच जना चेक अनादर मुद्दाका, एक जना जबरजस्ती करणी र एक जना वन सम्बन्धि मुद्दाका छन् ।
जिल्ला प्रहरी कार्यालय बारा तथा मातहतका प्रहरी इकाइ कार्यालयहरुबाट खटिएको टोलीले खोजतलास गरि उनीहरुलाइ नियन्त्रणमा लिएको हो । प्रहरीले जितपुरसिमरा-९ का पहलाद चौधरी, सरिता चौधरी, राधाराम दुसाध, जितपुरसिमरा-७ का अतुल राय, करण सहनीलाई पक्राउ गरेको उनले बताए ।
यसैगरी कलैया-१५ अनसारुल हल अन्सारी र कलैया-१६ का पन्नालाल मण्डल समेतलाइ नियन्त्रणमा लिएको प्रहरीको भनाई छ ।
पक्राउ परेकाहरुलाइ आवश्यक कारबाहीका लागि जिल्ला अदालत बाराको जिम्मा लगाईएको प्रहरीले जानकारी दिएको छ ।
