महोत्तरी । टिपरको ठक्करबाट महोत्तरीमा ट्याक्टरमा सवार एक जनाको मृत्यु भएको छ । दुर्घटनामा थप तीन जना घाइते भएका छन् ।
बर्दीबास नगरपालिका वडा नम्बर ५ टुटेश्वरस्थित जंगलमा टिपरको ठक्करबाट ट्याक्टरमा सवार एक जनाको मृत्यु भएको हो ।
मृत्यु हुनेमा सर्लाही इश्वरपुर नगरपालिका वडा नम्बर १२ निवासी ३७ वर्षका सन्तोष मगराती रहेका प्रहरीले जनाएको छ ।
महोत्तरीको माईस्थानबाट सर्लाहीतर्फ जाँदै गरेको ना ४ त ६८२३ नम्बरको ट्याक्टरलाई ना ८ ख ३१६ नम्बरको टिपरले शुक्रबार राति ठक्कर दिँदा दुर्घटना भएको थियो ।
घटनामा महोत्तरी बर्दीबास–७ की १५ वर्षीया दीक्षा लुङ्गेली, सर्लाही ईश्वरपुर–१२ का १७ वर्षीय रविन मिरिङचिङ र ४४ वर्षीय डम्बरबहादुर मगर घाइते भएका छन् ।
घाइतेहरुको बर्दीबासस्थित शुभस्वास्तिक अस्पतालमा उपचार भइरहेको प्रहरीले जनाएको छ ।
उनीहरुको टाउको, छाती र कम्मरमा चोट लागेको प्रहरीको भनाइ छ ।
दुर्घटनामा संलग्न दुवै सवारी र चालकलाई प्रहरीले नियन्त्रणमा लिएर आवश्यक अनुसन्धान गरिरहेको जानकारी दिएको छ ।
