जनकपुर । नेकपा एमाले मधेश प्रदेश सरकारमा सहभागी हुने भएको छ ।
शीर्ष तहमा भएको सहमतिअनुसार एमालेले मुख्यमन्त्री कृष्ण यादव नेतृत्वको सरकारलाई समर्थन गर्दै सरकारमा सहभागिता जनाउन लागेको हो ।
एमाले मधेश प्रदेश संसदीय दलका नेता सरोज यादवका अनुसार पार्टीबाट बाराका मोहम्मद समिर आजै विनाविभागीय मन्त्रीका रूपमा शपथ लिने तयारी भएको छ ।
पूर्वमुख्यमन्त्री समेत रहेका नेता यादवले एमाले सरकारमा सहभागी भएसँगै शुक्रबार बस्ने प्रदेशसभा बैठकमा हुने विश्वासको मतको पक्षमा मतदान गर्ने निर्णय भएको जानकारी दिए ।
उनका अनुसार पार्टीको केन्द्रीय नेतृत्वको निर्णयअनुसार एमालेले मुख्यमन्त्री यादव नेतृत्वको सरकारलाई विश्वासको मत दिनेछ ।
एमाले सरकारमा सहभागी भएपछि मधेश प्रदेशको सत्ता समीकरणमा नयाँ मोड आएको छ ।
