काठमाडौँ । जाडो याममा प्रायः मानिसहरू तातो चिया, कफी वा सूपतर्फ आकर्षित हुने गर्छन् ।
तर स्वास्थ्यका हिसाबले कागती पानी भने मौसमसँग नबाँधिने एक प्रभावकारी पेय पदार्थका रूपमा लिन सकिन्छ ।
कागतीमा पाइने भिटामिन सी, एन्टिअक्सिडेन्ट तथा शरीर सफा गर्ने गुणले चिसो मौसममा पनि शरीरलाई सक्रिय र तन्दुरुस्त राख्न सहयोग गर्छ ।
तर जाडोमा कागती पानी सेवन गर्दा केही कुरामा सावधानी नअपनाए फाइदाभन्दा बेफाइदा हुन सक्ने भएकाले यसको सही तरिका र प्रभावबारे जान्नु जरुरी हुन्छ ।
जाडो मौसममा कागती पानीका फाइदाहरू धेरै छन् ।
यसमा रहेको प्रशस्त भिटामिन सीले रोग प्रतिरोधात्मक क्षमता मजबुत बनाउँदै रुघाखोकी, ज्वरो र संक्रमणको जोखिम कम गर्न मद्दत गर्छ ।
मनतातो पानीमा कागती मिसाएर पिउँदा शरीरभित्र जम्मा भएका विषाक्त तत्व बाहिर निकाल्न सहयोग पुग्छ र मेटाबोलिजम पनि सक्रिय हुन्छ ।
चिसो मौसममा पाचन प्रक्रिया सुस्त हुने भएकाले कागती पानीले ग्यास, कब्जियत र पेट फुल्ने जस्ता समस्या कम गर्न उपयोगी भूमिका खेल्छ ।
बिहान खाली पेटमा मनतातो कागती पानी पिउँदा बोसो घटाउन मद्दत पुग्ने भएकाले तौल नियन्त्रण गर्न चाहनेहरूका लागि पनि यो लाभदायी मानिन्छ ।
यसका साथै, जाडोमा छाला सुक्खा र निस्तेज हुने समस्या देखिने गर्छ ।
कागती पानीले शरीरमा आवश्यक पानीको मात्रा कायम राख्न र छालामा प्राकृतिक चमक ल्याउन सहयोग पुर्याउँछ ।
यद्यपि, कागती पानी पिउँदा सावधानी अपनाउनु उत्तिकै आवश्यक छ ।
धेरै चिसो पानीमा कागती मिसाएर सेवन गर्दा घाँटी दुख्ने वा रुघाखोकी बढ्ने सम्भावना हुन्छ, त्यसैले सधैँ मनतातो पानी प्रयोग गर्नु उपयुक्त हुन्छ ।
खाली पेटमा कागती पानी पिउँदा केही व्यक्तिमा एसिडिटी, पेट पोल्ने वा असहजता हुन सक्छ ।
कागतीको अम्लीय गुणले दाँतको इनामेल कमजोर बनाउन सक्ने भएकाले स्ट्र प्रयोग गरेर पिउनु वा पिएपछि सफा पानीले मुख कुल्ला गर्नु राम्रो मानिन्छ ।
त्यसैगरी, अत्यधिक मात्रामा कागती पानी सेवन गर्नु शरीरका लागि हानिकारक हुन सक्ने भएकाले ठिक्क मात्रामा र नियमित तरिकाले सेवन गर्नु नै बुद्धिमानी उपाय हो ।
