काठमाडौँ। मधेश प्रदेशकी गृह, कानुन तथा सञ्चारमन्त्री विमला अन्सारीले संघीय गृहमन्त्री ओमप्रकाश अर्यालसँग प्रदेशको सुरक्षा अवस्था केन्द्रमा राख्दै विस्तृत राजनीतिक–सुरक्षा संवाद गरेकी छन्।
गृह मन्त्रालयमै भएको भेटमा उनले प्रदेशमा बढ्दै गएको अपराध, स्थानीय प्रशासनबीचको समन्वयको समस्या र सामाजिक सद्भावमा परिरहेको दबाबबारे केन्द्र सरकारलाई प्रत्यक्ष जानकारी गराइन्।
प्रहरी महानिरीक्षक दानबहादुर कार्की समेत उपस्थित उक्त छलफलमा मन्त्री अन्सारीले खासगरी प्रहरी समायोजन ऐन ढिलाइ हुँदा प्रदेशमा सुरक्षा व्यवस्थापन प्रभावित भएको उल्लेख गर्दै, ऐनलाई शीघ्र अघि बढाउन संघ सरकारलाई औपचारिक अनुरोध राखिन्।
उनका अनुसार समायोजन पूरा भएपछि सेवा–सुरक्षा प्रणाली अझै एकीकृत र प्रभावकारी हुने छ।
गृहमन्त्री अर्यालले संघीय सरकार मधेश प्रदेशको शान्ति–सुरक्षा सुदृढीकरणमा पूर्ण रूपमा प्रतिबद्ध रहेको दोहोर्याउँदै, केन्द्र–प्रदेश सहकार्यलाई थप बलियो बनाइने आश्वासन दिए।
उनले आगामी निर्वाचन तोकिएको समयमै सम्पन्न गर्ने सरकारको तयारीबारे पनि जानकारी गराए।
हालै देशका विभिन्न स्थानमा देखिएका तोडफोड, सार्वजनिक तथा निजी सम्पत्तिमा भएको क्षति र त्यसमाथि प्रतिगामी तत्वको सम्भावित संलग्नताबारे मन्त्री अन्सारीले चिन्ता व्यक्त गर्दै, यस्ता गतिविधि रोकथामका लागि सबै तहमा उच्च सतर्कता आवश्यक रहेको बताइन्।
मधेशमा पछिल्ला महिनामा देखा परेका सुरक्षा चुनौती र राजनीतिक संवेदनशीलताले संघ–प्रदेशबीच नियमित समन्वय अपरिहार्य भएको मन्त्री अन्सारीको भनाइ छ।
