वीरगन्ज । बिहार विधानसभा चुनावको दुई चरणको मतदान नोभेम्बर ६ र ११ तारिख (कात्तिक २० र २५ गते) नजिकिँदै गर्दा, विपक्षी दलहरूको ‘महागठबन्धन’ले अन्ततः राष्ट्रिय जनता दल (आरजेडी) का युवा नेता तेजस्वी यादवलाई मुख्यमन्त्री पदको अनुहार (सीएम फेस) को रूपमा औपचारिक रूपमा घोषणा गरेको छ।
कांग्रेस (आई), राष्ट्रिय जनता दल, भारतीय कम्युनिष्ट पार्टी लगायत सात दलको यो गठबन्धनले आज आयोजित संयुक्त पत्रकार सम्मेलनमार्फत एकताको सन्देश दिएको हो।
महागठबन्धनको यो महत्त्वपूर्ण घोषणा कांग्रेसका वरिष्ठ नेता तथा राजस्थानका मुख्यमन्त्री अशोक गहलोतले गरे। उनले गठबन्धनभित्र लामो समयदेखि चलिरहेको ‘सीएम फेस’को अन्योललाई समाप्त पार्दै भने, ‘तेजस्वी यादव हाम्रो नेता हुनुहुन्छ, उहाँ मुख्यमन्त्रीको उम्मेदवार हुनुहुन्छ।’
गहलोतले गठबन्धनले जित हासिल गरेमा तेजस्वी यादव मुख्यमन्त्री बन्ने र विकासशील इन्सान पार्टीका अध्यक्ष मुकेश सहनी उपमुख्यमन्त्री बन्ने जानकारी दिए। उनले बाँकी उपमुख्यमन्त्रीहरू पनि पिछडिएका समुदायबाट नियुक्त गरिने बताए, जसले गर्दा गठबन्धनको ‘सामाजिक न्याय’को एजेन्डा मजबुत देखियोस्। उनले एनडीए गठबन्धनलाई आफ्नो मुख्यमन्त्रीको अनुहार सार्वजनिक गर्न चुनौती दिए।
महागठबन्धनका नेता घोषित भएपछि तेजस्वी यादवको आत्मविश्वास चुलिएको देखिन्थ्यो। उनले नेताहरू र जनताले आफूमाथि राखेको विश्वासको लागि धन्यवाद व्यक्त गर्दै भने, ‘म पाँच वर्षमा होइन, २० महिनामा काम गरेर देखाउने छु।’
उनले विगत २० वर्षदेखिको ‘अयोग्य’ सरकारलाई उखालेर फ्याँक्ने प्रतिबद्धता दोहोर्याए। आफ्नो नेतृत्वमा सरकार बनेमा प्रत्येक घरबाट एक जनालाई सरकारी जागिर दिने आफ्नो मुख्य चुनावी वाचालाई उनले फेरि बलियोसँग प्रस्तुत गरे।
