काठमाडौँ । नेपालीहरुको महान् चाड बडादशैंको मुख्य दिन विजयादशमी आज देशभर उत्साहपूर्वक मनाइँदैछ ।
आजका दिन मान्यजनको हातबाट देवी दुर्गाको प्रतीक स्वरूप टीका, जमरा र प्रसाद ग्रहण गरी यश, ऐश्वर्य, दीर्घायु र समृद्धिको कामना गर्ने परम्परा रहेको छ ।
नेपाल पञ्चाङ्ग निर्णायक विकास समितिका अनुसार टीका लगाउने उत्तम साइत बिहान ११ बजेर ५३ मिनेटमा रहेको छ ।
टीका लगाउँदा ग्रहण गर्ने व्यक्ति पूर्वतर्फ र लगाइदिने व्यक्ति पश्चिमतर्फ फर्किनुपर्ने समितिले जनाएको छ ।
त्यसअघि बिहान ९ बजेर २३ मिनेटमा देवी विसर्जन गर्ने साइत रहेको समितिका सदस्य डा. बासुदेव कोइरालाले जानकारी दिए ।
उनका अनुसार विजयादशमी आफैंमा शुभ दिन भएकाले सामान्य व्यक्तिले साइत खोज्न आवश्यक पर्दैन ।
तर राज्य सञ्चालकहरुले भने साइतमै टीका ग्रहण गर्नुपर्ने परम्परा रहेको छ । समितिका अर्का सदस्य देवमणि भट्टराईका अनुसार टीका लगाउनु अघि दुर्गा विसर्जन गर्नुपर्ने नियम छ ।
टाढा जानुपर्ने बाध्यता भए बिहानै विसर्जन गरेर पनि टीका लगाउन सकिने उनले बताए ।
आजका दिन गुरु–पुरोहित, हजुरबुबा–हजुरआमा, बा–आमा, मान्यजन तथा ठूलाबडाबाट टीका, जमरा र प्रसाद थापी आशीर्वाद लिने चलन छ ।
आज नभ्याउनेले कोजाग्रत पूर्णिमासम्म मान्यजनबाट टीका ग्रहण गर्न सक्ने प्रचलन रहेको छ ।
कोजाग्रत पूर्णिमाको दिन महालक्ष्मीको व्रत बसेर पूजा गरी दशैं पर्व समापन गर्ने परम्परा छ ।
नेपालभरिकै साथै विदेशमा रहेका नेपालीले समेत सामूहिक रूपमा टीका–जमरा ग्रहण गर्दै विजयादशमी मनाउने गर्छन् ।
