सप्तरी । सप्तरीको अग्निसाइर कृष्णासवरन गाउँपालिका–६ मोहनपुरमा सर्पदंशबाट एक महिलाको ज्यान गएको छ।
स्थानीय ५० वर्षीया संगीता राईको घरमै सर्पले डसेपछि मृत्यु भएको हो। उनी इन्द्रबहादुर राईकी श्रीमती हुन्।
इलाका प्रहरी कार्यालय कञ्चनपुरका प्रहरी नायब उपरीक्षक माधवप्रसाद काफ्लेले घटनाको पुष्टि गर्दै तराई क्षेत्रमा हाल गर्मी अत्यधिक बढेकाले विषालु सर्पको सक्रियता बढेको जानकारी दिए।
“गर्मीको मौसममा सर्पको आक्रमणका घटना बढ्ने गर्छन्,” काफ्लेले भने, “सावधानी नअपनाउँदा यस्तो दुःखद् परिणाम हुन सक्छ।”
विशेषगरी रातको समयमा चप्पल वा बुट नलगाई हिँड्दा, खेतबारी वा झाडी क्षेत्रमा जानु पर्दा सजग रहन चिकित्सकहरूले सुझाव दिएका छन्।
तराईका जिल्लाहरूमा पछिल्लो समय सर्पदंशका घटनाहरूमा वृद्धि देखिन थालेको छ।
यस्ता अवस्थामा समयमै अस्पताल पुर्याउन नसक्दा मृत्यु दर उच्च हुने गरेको तथ्यांकले देखाएको छ।
प्रशासन र स्वास्थ्य निकायले नागरिकहरूलाई सचेत रहन तथा आपतकालीन अवस्थामा तुरुन्तै नजिकको स्वास्थ्य संस्थामा सम्पर्क गर्न आग्रह गरेका छन्।
