बीरगन्ज । लगातार परेको पानीले मधेश प्रदेशमा बाढीको खतरा बढेको छ । शुक्रबारदेखि परेको पानीले प्रदेशमा उच्च जोखिम बढदै गएको छ ।
मधेश प्रदेश प्रहरीका अनुसार प्रदेशको सप्तरीको कोषी, रौतहट र सर्लाहीको सीमानामा पर्ने बागमती नदीमा पानीको बहाव बढेको छ ।
अन्य वर्ष भन्दा यो साल कोशी र बागमती नदीमा पानी सतह बढेको मधेश प्रहरीले जानकारी दिएको छ । दुइवटै नदीमा पानीको सतह बढेपछि सुरक्षा सतर्कता अपनाउन आग्रह गरिएको छ ।
जीउधनको क्षति हुन नदिनका लागि मातहतका स्थानीय प्रहरी चौकी तथा जिल्ला र प्रदेशमा उद्धार तथा राहतका लागि प्रहरी तैनाथ गरिएको मधेश प्रदेश प्रहरी प्रमुख लालमणी आचार्यले बताए ।
उनका अनुसार सबै प्रहरी चौकीहरुलाई ‘अलर्ट’मा राखिएको छ । नदी आसपास बस्ने स्थानीयलाई सुरक्षित स्थानमा जान आग्रह गरिएको मधेश प्रहरीले जानकारी दिएको छ ।
उनले भने, ‘योबाहेक अन्य साना नदीहरुमा पनि बाढीको सतह बढ्दै गएको छ, केही पालिकाहरु डुबानमा पनि छन् । तर अहिलेसम्म मानवीय क्षति कतै भएको छैन ।तैपनि बाढीबाट बचाउन सबै सतर्कता अपनाउन हरेक प्रहरी यूनिटलाई अलर्टमा राखिएको छ ।’
यसैबिच प्रदेशमा बाढीको उच्च जोखिम बढेपछि प्रदेश सरकारले सुरक्षित रहन आग्रह गरेको छ ।
मुख्यमन्त्री सतिस सिंहले एक सूचना जारी गर्दै तटीय क्षेत्रमा बसोबास गर्ने स्थानीयलाई सुरक्षित ठाउँमा गएर बस्न आग्रह गरेका छन् ।
बाढीबाट बढी क्षति हुन नदिनको प्रदेश सरकारले सबै सतर्कता अपनाएको भन्दै तटीय क्षेत्रमा बसोबास गर्ने बासिन्दालाई सुरक्षित ठाउँमा गएर बस्न उनको अनुरोध छ ।
उनले भनेका छन्, ‘बागमती नदी किनारका रौतहट र सर्लाही तथा कोशी नदीका गाउँबस्तीमा बाढी आउन सक्ने सम्भावना छ, त्यसकारण तपाइँहरु उच्च सतर्कता अपनाउनुहोला । सरकारको तर्फ गरिने बाँकी काम हामी गर्न तयार छौं, ढुक्क भएर सुरक्षित बस्नुहोला ।’
प्रदेशका नदीहरुमा जल पानीको सतह बढ्दै गएको भन्दै विपद् व्यवास्थापन समितिहरुलाई समेत सुरक्षित स्थानको व्यवस्थापनसहितको पूर्वतयारीमा जुट्न मुख्यमन्त्री सिंहले निर्देशन दिएका छन् ।
