वीरगन्ज । पर्सामा दुई फरक घटनामा किशोरी बलात्कारको आरोपमा दुई जना पक्राउ परेका छन्।
पक्राउ पर्नेमा जगरनाथपुर गाउँपालिका–६ सङ्ठीका २३ वर्षीय विशाल यादव र भारतको नागरिक मनिष पासवान रहेका छन्।
जिल्ला प्रहरी कार्यालय पर्साका सूचना अधिकारी प्रहरी नायब उपरीक्षक किशोर लम्सालका अनुसार, यादवले एक किशोरीमाथि बलात्कार गरेको आरोपमा पक्राउ परेका हुन्।
त्यस्तै, भारतीय नागरिक मनिष पासवानले एक किशोरीलाई विभिन्न प्रलोभन देखाएर भारत पुर्याई पटक–पटक बलात्कार गरेको प्रारम्भिक अनुसन्धानबाट खुलेको छ।
प्रलोभनमा पारेर भारतमा लगि यौन शोषण
अभियुक्त पासवानले किशोरीलाई विवाहको आश्वासनजस्ता भावनात्मक प्रलोभन देखाएर भारत लगेको र त्यहाँ पटक–पटक जबरजस्ती करणी गरेको उजुरीको आधारमा प्रहरीले उनलाई पक्राउ गरेको हो।
पीडित पक्षबाट जिल्ला प्रहरी कार्यालयमा उजुरी दिइएको थियो।
थुनामा राखेर अनुसन्धान
प्रहरीले दुवै अभियुक्तलाई नियन्त्रणमा लिएर करणीसम्बन्धी कसुर अन्तर्गत अनुसन्धान थालेको छ। जिल्ला अदालत पर्साबाट थुनामा राख्ने अनुमति प्राप्त भइसकेको प्रहरी प्रवक्ता लम्सालले जानकारी दिएका छन्।
हाल दुवै घटनाको विस्तृत अनुसन्धान अघि बढाइएको छ।
