काठमाडौं । भारत र पाकिस्तानबीच शनिबार साँझ ५ बजेदेखि युद्धविराम लागू भएको घोषणा गरिए पनि के यो केवल औपचारिकता मात्र थियो भन्ने प्रश्न उठ्न थालेको छ।
युद्धविरामको तीन घण्टा नबित्दै पाकिस्तानले गोलीबारी सुरु गरेको भारतीय सञ्चारमाध्यमहरू उल्लेख गर्छन्।
भारतीय पक्षका अनुसार राति ८ बजेदेखि जम्मू–कश्मीरको विभिन्न क्षेत्रमा – जस्तै अखनूर, पुंछ, नौशेरा, श्रीनगर, आरएस पुरा, साम्बा र उधमपुर – पाकिस्तानी पक्षबाट निरन्तर गोलीबारी भइरहेको छ।
यति मात्र होइन, राजौरी क्षेत्रमा गोलाबारी र उधमपुरमा ड्रोन आक्रमण समेत भएको दाबी गरिएको छ। पाकिस्तानको यस्तो गतिविधिले युद्धविरामको विश्वसनीयता र दुवै देशबीचको शान्ति प्रयासमाथि गम्भीर शंका उठाएको छ।
जम्मू–कश्मीरका मुख्यमन्त्री उमर अब्दुल्लाहले सामाजिक सञ्जालमार्फत प्रतिक्रिया दिँदै भनेका छन्, “यो कस्तो प्रकारको युद्धविराम हो? श्रीनगरमा विस्फोटका आवाजहरू सुनिएका छन्।”
विश्लेषकहरू भन्छन्, यस्तो अवस्थामा युद्धविराम केवल कागजी सहमति मात्र बन्न सक्छ, यदि त्यसको पालना व्यवहारमा देखिन्न भने।
भारत–पाक सम्बन्धको संवेदनशील अवस्थालाई ध्यानमा राख्दै विश्व समुदायले समेत यस्ता घटनालाई गम्भीर रूपमा लिनुपर्ने आवश्यकता औंल्याइएको छ।
