धनुषा । मधेश प्रदेशका मुख्यमन्त्री सतिश सिंहले वीरगन्जको आदर्शनगरस्थित दुईटा क्यासिनोको छड्के अनुगमन गरेका छन् ।
मुख्यमन्त्री सिंहले बुधबार लर्डस् दियालोको किङ्स क्यासिनो र होटल सुरजको क्यासिनो अनुगमन गरेका हुन् ।
क्यासिनोमा नेपाली नागरिकहरूले समेत जुवातास खेलेर गम्भीर सामाजिक, आर्थिक र मनोवैज्ञानिक सङ्कटमा परिरहेका र पछिल्लोपटक एक नेपालीले ४० लाख रुपैयाँ गुमाएको खबर उनले पाएका थिए ।
अनुगमनका क्रममा होटल सुरजको क्यासिनोबाट जुवा खेलिरहेका एक नेपाली नागरिकलाई नियन्त्रणमा लिइएको छ । नियन्त्रणमा लिइएको ती नेपाली नागरिकलाई प्रहरीको जिम्मा लगाइएको छ । विदेशी पर्यटकलाई लक्षित गरी सञ्चालन अनुमति पाएका क्यासिनोमा जुवा खेल्न र क्यासिनो स्थलमा नेपाली नागरिकको प्रवेश कानुनी रूपमै वर्जित छ ।
क्यासिनोमा प्रवेश गर्नेहरूको अभिलेख व्यवस्थापन रीतपूर्वक भएको नदेखिएपछि मुख्यमन्त्री सिंहले ती दुवै क्यासिनो व्यवस्थापनलाई एक महिनायता प्रवेश गरेकाहरूको परिचयपत्रसहितको प्रविष्टी सूची र एक साताको सिसिटिभी फुटेज, कर्मचारीको विवरण लगायतका कागजात लिएर मुख्यमन्त्री तथा मन्त्रिपरिषद्को कार्यालयमा आउन निर्देशन दिएका छन् ।
अनुगमनपछि पत्रकारहरूसँग कुरा गर्दै मुख्यमन्त्री सिंहले बुधबार वीरगन्जमा अस्पताल अनुगमन गर्न आएका बेला क्यासिनोका कारण एक नेपालीले ४० लाख रुपैयाँभन्दा बढी रकम गुमाएको सूचना प्राप्त भएपछि क्यासिनो अनुगमन गरिएको बताए ।
उनले सुरक्षालगायतका दृष्टिले क्यासिनो अत्यन्त संवेदनशील ठाउँ भए पनि तिनको व्यवस्थापकीय पक्ष सन्तोषजनक नभएको बताए ।
मुख्यमन्त्री सिंहले क्यासिनोबाट प्राप्त हुने दस्ताबेजको अध्ययन तथा विश्लेषणका आधारमा थप कारबाही अघि बढाइने जानकारी दिए ।
