काठमाण्डौँ । ललितपुरमा चक्कु प्रहारबाट एक जना इन्जिनियरिङ विद्यार्थीको हत्या भएको छ ।
च्यासलस्थित टाउन हब रेस्टुरेन्टमा भएको विवादका क्रममा भएको चक्कु प्रहारबाट एक इन्जिनियरिङ अध्ययनरत विद्यार्थीको हत्या भएको हो । मृत्यु हुनेमा २३ वर्षका नयन गुरुङ रहेका प्रहरीले जनाएको छ ।
गएराति उक्त रेस्टुरेन्टमा साथीहरूसँगै गएका नयनलाई रेस्टुरेन्टका कर्मचारी डडेलधुरा स्थायी घर भएका हेमराज भट्टले चक्कु प्रहार गरेको प्रहरीको भनाइ छ ।
आपसी विवादका क्रममा काउन्टरमा रहेका भट्टले प्रहार गरेको बताइएको छ । राति ९ बजेर २० मिनेटतिर भएको उक्त घटनापछि चक्कु प्रहार गर्ने भट्टलाई प्रहरीले नियन्त्रणमा लिएर अनुसन्धान कार्य अघि बढाएको छ ।
मृतक गुरुङ ललितपुरकै हिमालय कलेजको बीई चौथो सेमेस्टरमा अध्ययनरत थिए ।
