वीरगन्ज । नेपाली कांग्रेसको १५औँ महाधिवेशन नजिकिँदै गर्दा पार्टीभित्र पदाधिकारीका आकांक्षीहरू खुल्न थालेका छन् ।
यही क्रममा केन्द्रीय सहमहामन्त्री फरमुल्लाह मन्सुरले उपसभापति पदमा आफ्नो दाबी अघि सारेका छन् ।
लामो समयदेखि कांग्रेसको संगठन र राष्ट्रिय राजनीतिमा सक्रिय मन्सुरका लागि उपसभापतिको दाबी पदोन्नतिको सामान्य प्रयास मात्रै नभई पाँच दशक लामो राजनीतिक यात्रालाई नयाँ जिम्मेवारीमा लैजाने प्रयासका रूपमा हेरिएको छ ।
मन्सुरको राजनीतिक यात्रा २०२८ सालबाट सुरु भएको हो ।
भारतको पटना पुगेका बेला उनले कांग्रेसका संस्थापक नेता बीपी कोइरालाबाट पार्टी सदस्यता लिएका थिए ।
त्यसपछि उनी बारा कांग्रेसको संगठन निर्माणमा सक्रिय भए ।
जिल्ला संगठनमा विभिन्न जिम्मेवारी सम्हाल्दै उनी उपसचिव र सचिव बने भने बहुदलीय व्यवस्था पुनःस्थापनापछि २०४८ देखि २०५७ सालसम्म जिल्ला सभापतिको जिम्मेवारीमा रहे ।
जिल्ला राजनीतिमा लामो समय नेतृत्व गरेपछि मन्सुर राष्ट्रिय राजनीतिमा स्थापित भए ।
२०५६ सालमा प्रतिनिधिसभा सदस्य निर्वाचित भएका उनी दोस्रो संविधानसभाका सदस्यसमेत बने ।
संविधान निर्माण प्रक्रियामा सहभागी हुनुका साथै उनले पार्टी र सरकार दुवैतर्फको राजनीतिक अनुभव हासिल गरे ।
सरकारमा रहँदा मन्सुरले विज्ञान तथा प्रविधि र श्रम तथा रोजगार मन्त्रालयको जिम्मेवारी सम्हाले ।
श्रम तथा वैदेशिक रोजगारीसँग जोडिएका विषयमा उनको लामो राजनीतिक सक्रियता रहँदै आएको छ ।
कांग्रेसको १४औँ महाधिवेशनमा मुस्लिम क्लस्टरतर्फबाट सहमहामन्त्री निर्वाचित भएका मन्सुर अहिले पार्टीको पदाधिकारी तहमा छन् ।
मुस्लिम समुदायको प्रतिनिधित्वसँगै मधेशको राजनीतिमा समेत उनको प्रभावलाई कांग्रेसभित्र महत्त्वपूर्ण मानिन्छ ।
पछिल्लो समय कांग्रेसभित्र नेतृत्व परिवर्तन र पार्टी पुनर्संरचनाको बहस चलिरहँदा मन्सुरले पनि आफ्नो राजनीतिक धारणा स्पष्ट रूपमा राख्दै आएका छन् ।
विशेष महाधिवेशनका क्रममा गगन थापालाई पार्टी नेतृत्वमा अघि बढाउनुपर्ने पक्षमा उभिएका मन्सुरले अब भने आफूलाई उपसभापतिको भूमिकामा अघि सार्ने तयारी गरेका हुन् ।
मन्सुरको दाबीमा उनको लामो राजनीतिक अनुभवसँगै मधेश र मुस्लिम समुदायको प्रतिनिधित्वको प्रश्न पनि जोडिएको छ ।
पार्टीको जिल्ला नेतृत्वदेखि केन्द्रीय पदाधिकारीसम्मको अनुभव, संसदीय भूमिका र सरकार सञ्चालनको अनुभवलाई उनले उपसभापतिको दाबीको आधार बनाएका छन् ।
कांग्रेसमा नेतृत्वको पुस्तान्तरणसँगै क्षेत्रीय, सामाजिक र समुदायगत प्रतिनिधित्वको बहस पनि चलिरहेको छ ।
यस्तो अवस्थामा मन्सुरको उम्मेदवारीले पार्टीभित्रको शक्ति समीकरणमा कस्तो प्रभाव पार्छ भन्ने चासो बढेको छ ।
१५औँ महाधिवेशनमा उपसभापति पदका लागि आकांक्षीहरूको संख्या बढ्दै जाँदा मन्सुरको दाबी पनि कांग्रेसभित्रको आगामी प्रतिस्पर्धाको एउटा महत्वपूर्ण पाटो बन्ने देखिएको छ ।
पाँच दशक लामो राजनीतिक यात्रापछि मन्सुरले अब कांग्रेसको दोस्रो तहको नेतृत्वमा आफूलाई कसरी स्थापित गर्छन् भन्ने विषय महाधिवेशनको मुख्य चासोमध्ये एक बन्ने देखिन्छ ।
