काठमाडौँ । सोमबार नेपाली बजारमा सुनको मूल्य एकैदिन उल्लेख्य रूपमा उक्लिएको छ।
नेपाल सुनचाँदी व्यवसायी महासंघका अनुसार सुनको भाउ तोलामा ४ हजार ६ सय रुपैयाँले बढ्दै प्रतितोला २ लाख ६५ हजार रुपैयाँ कायम भएको छ।
यसअघि आइतबार प्रतितोला २ लाख ६० हजार ४ सय रुपैयाँमा कारोबार भएको सुनको मूल्य अन्तर्राष्ट्रिय बजारको प्रभावसँगै बढेको हो।
अमेरिकाले भेनेजुयलामा गरेको आक्रमण र नियन्त्रणसँग सम्बन्धित घटनाक्रमपछि विश्व बजारमा सुनप्रति लगानीकर्ताको आकर्षण बढ्दा यसको असर नेपाली बजारमा पनि देखिएको महासंघले जनाएको छ।
अन्तर्राष्ट्रिय बजारमा शनिबार र आइतबार कारोबार बन्द रहने भए पनि सोमबार खुलेसँगै सुनको मूल्य तीव्र गतिमा उक्लिएको हो।
विश्व बजारमा सुनको मूल्य प्रतिऔंस ४ हजार ४ सय अमेरिकी डलर नाघेको बताइएको छ।
यसैबीच, चाँदीको मूल्यमा पनि वृद्धि देखिएको छ।
सोमबार चाँदीको भाउ तोलामा १८५ रुपैयाँले बढ्दै प्रतितोला ४ हजार ६८५ रुपैयाँ पुगेको छ।
अघिल्लो दिन चाँदी प्रतितोला ४ हजार ५ सय रुपैयाँमा कारोबार भएको थियो।
