सप्तरी । सप्तरीमा प्रहरीले गोली चलाउँदा एकजनाको मृत्यु भएको छ ।
राजगढ गाउँपालिका–२ मा मदिरा तस्करी नियन्त्रणका लागि प्रहरीले सञ्चालन गरेको सर्च अपरेशनका क्रममा भएको झडपमा एकजनाको मृत्यु भएको हो ।
मृत्यु हुनेमा स्थानीय लालु यादव रहेको मधेस प्रदेश प्रहरीले पुष्टि गरेको छ ।
मधेस प्रदेश प्रहरी प्रमुख उमाप्रसाद चतुर्वेदीका अनुसार नेपाल–भारत सीमा क्षेत्र हुँदै ठूलो परिमाणमा मदिरा भण्डारण तथा तस्करी भइरहेको सूचनाका आधारमा गएराति प्रहरी टोली परिचालन गरिएको थियो ।
अपरेशनका क्रममा तस्कर समूहले सुरक्षाकर्मीमाथि घेरा हाल्दै ढुंगा प्रहार गर्न थालेपछि आत्मरक्षाका लागि ७ राउण्ड गोली चलाइएको प्रहरीले जनाएको छ ।
गोली यादवको तिघ्रामा लागेको थियो । उनलाई उपचारका लागि अस्पताल लैजाने क्रममा बाटैमा मृत्यु भएको प्रहरीले जानकारी दिएको छ ।
प्रहरीले घटनास्थलबाट विभिन्न ब्राण्डका ८० कार्टुन मदिरा बरामद गरेको जनाएको छ ।
प्रहरीले सीमा क्षेत्रमा मदिरा तस्करी नियन्त्रणका लागि अभियानलाई थप कडाइ गर्ने जनाएको छ ।
