वीरगन्ज । लामो खडेरीपछि मधेश प्रदेशमा भएको वर्षाले किसानहरूलाई ठूलो राहत मिलेको छ।
सिँचाइको अभावमा चिन्तित बनेका किसानहरूले पछिल्ला केही दिनदेखि भइरहेको सामान्य वर्षाले खुसी व्यक्त गरेका छन्।
यस वर्ष मनसुन सुरु हुन ढिलाइ हुँदा प्रदेशका आठवटै जिल्लामा धान रोपाइँ प्रभावित भएको थियो। खेतहरू सुख्खा भएका कारण रोपाइँका लागि आवश्यक तयारी गर्न सम्भव थिएन। तर, शुक्रबारदेखि प्रदेशका विभिन्न ठाउँमा सामान्य वर्षा भइरहेको छ, जसले धान रोपाइँका लागि आवश्यक पानीको जोहो गर्न सहयोग पुगेको छ।
वर्षाको अभावमा भूमिगत जलको सतह पनि घट्दै गएको थियो। वीरगन्जसहित मधेशका धेरैजसो ठाउँमा चापाकलहरू सुकेका थिए भने खानेपानी र अन्य कामका लागि पनि समस्या परेको थियो। अहिले वर्षापछि जमिनको पानीको सतह बढेको छ र सुकेका केही चापाकलहरूमा पनि पानी आउन सुरु भएको छ, जसले किसानलाई सिँचाइका साथै दैनिक जीवनमा पनि सहजता प्रदान गरेको छ।
लामो खडेरीका कारण यस वर्ष धान रोपाइँमा ढिलाइ भएको छ। सामान्यतया, यो समयसम्म धेरैजसो ठाउँमा रोपाइँ सकिइसक्नुपर्ने हो। तर, अहिले बल्ल रोपाइँ सुरु हुँदैछ। ढिलो रोपाइँले धानको उत्पादनमा असर पर्ने चिन्ता किसानहरूमा छ। यद्यपि, अहिले भइरहेको वर्षाले यो क्षतिलाई केही हदसम्म कम गर्ने आशा गरिएको छ।
कृषि विज्ञहरूका अनुसार, यो वर्षाले धान रोपाइँका लागि राम्रो अवसर प्रदान गरेको छ। किसानहरूलाई समयको सदुपयोग गरी छिटो रोपाइँ सक्न सुझाव दिइएको छ। मौसम विभागले आगामी केही दिनसम्म पनि हल्कादेखि मध्यम वर्षा हुने सम्भावना रहेको जनाएको छ, जसले कृषि कार्यमा थप सहयोग पुग्ने अपेक्षा गरिएको छ।
