वीरगन्ज । नेपाली क्रिकेटप्रेमीका लागि एउटा उत्साहजनक खबर आएको छ ।
अन्तर्राष्ट्रिय क्रिकेट परिषद् (आईसीसी)ले नेपाललाई २०२६ को आईसीसी महिला टी–२० विश्वकप छनोट प्रतियोगिताको आयोजकका रूपमा चयन गरेको छ। यो निर्णयसँगै नेपाली क्रिकेटले अन्तर्राष्ट्रिय स्तरमा आफ्नो आयोजना क्षमता प्रदर्शन गर्ने महत्त्वपूर्ण अवसर पाएको छ। आगामी २०२६ जनवरी १२ देखि फेब्रुअरी २ सम्म चल्ने यो प्रतियोगिता नेपालका लागि ऐतिहासिक हुनेछ।
यो छनोट प्रतियोगितामा विश्वकपमा स्थान बनाउनका लागि १० टोलीहरूले कडा प्रतिस्पर्धा गर्नेछन्। सन् २०२६ मा इंग्ल्यान्ड र वेल्समा हुने महिला टी–२० विश्वकपका लागि कुल चार स्थान सुरक्षित गरिनेछ। यसअघि नै, बंगलादेश र आयरल्यान्डले २०२४ को आईसीसी महिला टी–२० विश्वकपमा सहभागिता जनाएका आधारमा स्वतः छनोटमा स्थान पक्का गरिसकेका छन्।
नेपाल र थाइल्यान्डले एसिया क्षेत्रीय मार्गबाट आफ्नो स्थान सुरक्षित गरेका छन् भने अमेरिकाले अमेरिका क्षेत्रबाट आफ्नो सहभागिता सुनिश्चित गरेको छ। बाँकी पाँच स्थानहरू भने अफ्रिका (२), युरोप (२) र पूर्वी एसिया–प्रशान्त क्षेत्र (१) बाट सम्बन्धित क्षेत्रीय छनोट प्रतियोगिता पूरा गरेपछि निर्धारण हुनेछन्।
नेपालमा आयोजना हुने यस छनोट प्रतियोगितामा सहभागी १० टोलीलाई दुई समूहमा पाँच–पाँच टोलीको रूपमा विभाजन गरिनेछ। समूह चरणका खेलहरू पछि, शीर्ष टोलीहरूले सुपर सिक्स चरणमा प्रवेश पाउनेछन् र अन्त्यमा फाइनल खेल हुनेछ। यस प्रतियोगिताको पूर्ण तालिका चाँडै नै आईसीसीद्वारा घोषणा गरिनेछ।
नेपालमा छनोट हुने चार टोलीसहितको २०२६ को आईसीसी महिला टी–२० विश्वकप भने इंग्ल्यान्ड र वेल्समा १२ जुनदेखि ५ जुलाई २०२६ सम्म चल्नेछ। यो प्रमुख प्रतियोगिता कुल २४ दिनसम्म चल्नेछ, जसमा सात स्थानहरूमा ३३ खेलहरू खेलिनेछन्। यसमा ओल्ड ट्राफोर्ड, हेडिङ्ले, ह्याम्पशायर बाउल र ब्रिस्टल काउन्टी ग्राउन्ड जस्ता प्रसिद्ध क्रिकेट मैदानहरू समावेश छन्।
प्रतियोगिताको ग्रान्ड फाइनल भने ऐतिहासिक लर्ड्स क्रिकेट ग्राउन्डमा आयोजना हुनेछ, जुन क्रिकेटको घर मानिन्छ।
