५ असोज, बीरगन्ज । बीरगन्ज भन्सार कार्यालयले हालसम्म २५ अर्ब भन्दा बढी रुपैंया राजश्व संकलन गरेको छ । कार्यालयले चालु आर्थिक वर्षको भदौसम्म २५ अर्ब ४० करोड ३१ लाख ४३ हजार रुपैंया सङ्कलन गरेको हो ।
भदौसम्म भन्सार विभागले कार्यलयलाई ३५ अर्ब ५७ करोड २७ लाख ५६ हजार राजस्व सङ्कलनको लक्ष्य निर्धारण गरेको थियो ।जसमध्ये ७१ प्रतिशत लक्ष्य पुरा भएको बीरगन्ज भन्सार कार्यालयले जनाएको छ ।
प्रमुख भन्सार प्रशासक दिपक लामिछानेका अनुसार गत वर्षको सोही अवधि भन्दा चालु आवमा राजश्व संकलनमा वृद्धि भएको हो । गत वर्षको तुलनामा यस वर्ष झण्डै एक अर्ब रुपैंयाले राजस्व संकलनमा वृद्धि भएको उनी बतांउछन् ।
गत वर्षको सोही समयमा कार्यालयले २४ अर्ब ५७ करोड ९२ लाख ५७ हजार रुपैंया संकलन गरेको उनले बताए । त्यो कार्यालयले पाएको लक्ष्यको ७० प्रतिशत हो ।
३५ अर्ब ४४ लाख ४२ हजार राजस्व सङ्कलन गर्ने लक्ष्य पाएको प्रमुख भन्सार प्रशासक लामिछानेले जनाए । सो अवधिमा कार्यालयबाट सबैभन्दा धेरै पेट्रोलियम पदार्थ आयात भएको उनको भनाइ छ ।
