काठमाण्डौँ । बिदेश पठाइदिन्छु भन्दै रकम ठगी गरेको आरोपमा दुइ जना पक्राउ परेका छन् ।
पक्राउ पर्नेमा सर्लाहीको ब्रह्मपुरी गाउँपालिका वडा नम्बर ३ घर भइ काठमाण्डौँ टोखा–८ बस्ने मनिषा कुमारी र मकनवानपुरको बकैया गाउँपालिका–५ घर भइ काठमाडौंको नागार्जुन–५ सितापाइला बस्ने ३९ वर्षीय सुवर्ण कुमार बल रहेका छन् ।
सुवर्णमाथि यूरोपियन देश क्रोएसिया पठाइदिन्छु भन्दै एकजना पीडितबाट १५ लाख रूपैयाँ तथा मनिषाले दुबई पठाइदिन्छु भन्दै १ जना पीडितबाट २ लाख ४५ हजार रूपैयाँ लिई ठगी गरेको आरोप छ ।
रकम लिएपछि सम्पर्कविहीन भएको भन्ने पीडितहरूको उजुरीको आधारमा काठमाडौं उपत्यका अपराध अनुसन्धान कार्यालय टेकुबाट खटिएको टोलीले सुवर्णलाई काठमाडौंको बाफलबाट सोमबार र मनिषालाई नयाँबसपार्कबाट मंगलबार पक्राउ गरेको हो ।
उनीहरूलाई आवश्यक अनुसन्धान तथा कारबाहीका लागि वैदेशिक रोजगार विभाग ताहचल काठमाडौं पठाइएको छ ।
