रौतहट । रौतहटमा आम जनता पार्टी (आजपा) का समानुपातिक उम्मेदवारमाथि आक्रमण भएको छ ।
प्रभु साह नेतृत्वको पार्टीबाट रौतहट-३ का समानुपातिक उम्मेदवार लालबाबु मन्सुरीमाथि सोमबार साँझ आक्रमण भएको हो ।
चुनावी प्रचार प्रसारको क्रममा गुजरा नगरपालिका वडा नम्बर ६ बेदौउली गाउॅंमा उनीमाथि विपक्षी पार्टीका कार्यकर्ताहरुले आक्रमण गरेका आरोप छ ।
आक्रमणबाट उनको नाकको हड्डी भाच्चिएको छ ।
घाइते मन्सुरीको चन्द्रनिगाहपुर स्थित एक अस्पतालमा उपचारपछि घर लगिएको पारिवारिक स्रोतले जनाएका छन् ।
सोमवार साँझ प्रतिनिधिसभा सदस्य पदको उम्मेदवार पार्टी अध्यक्ष तथा पूर्व मन्त्री प्रभु साहले गुजरा ६ बेदौली गाउँमा घरदैलो कार्यक्रम गरिरहेका थिए । सोही क्रममा विपक्षी पार्टीका केहि कार्यकर्ताहरूले डिजे बजाउदै कार्यक्रम बिथोल्न खोजेका थिए ।
त्यही विपक्षी कार्यकर्तालाई सम्झाउन खोज्दा उनीहरुले धक्का दिएको र एकजना अपरिचित युवकले टाढैबाट लौरोले हान्दा नाकमा लागेर घाइते भएको मन्सुरीले बताए ।
घटना लगत्तै प्रहरी टोली त्यहाँ पुगेर अवस्था साम्य बनाएका थिए । प्रहरीलाई देख्नासाथ उनीहरू फरार भएका थिए ।
आक्रमण गर्नेहरूमा जसपा र रास्वपाका स्थानीय कार्यकर्ता रहेको उनको भनाइ छ ।
यसबारे आवश्यक अनुसन्धान भइरहेको रौतहट प्रहरीले जनाएको छ ।
