वीरगन्ज। चालु आर्थिक वर्षको पहिलो तीन महिनामा वीरगन्ज भन्सार नाका हुँदै आठ अर्ब ७० करोड रुपैयाँ बराबरका विभिन्न सवारीसाधन नेपाल भित्रिएका छन्।
तीमध्ये विद्युतीय सवारीसाधनको आयात अघिल्ला वर्षको तुलनामा उल्लेख्य रूपमा बढेको भन्सार कार्यालयले जनाएको छ।
वीरगन्ज भन्सार कार्यालयका प्रमुख भन्सार प्रशासक विष्णुप्रसाद ज्ञवालीका अनुसार, सो अवधिमा सवारीसाधन आयातबाट सात अर्ब ७७ करोड रुपैयाँ राजस्व संकलन भएको छ।
गत आर्थिक वर्षको सोही अवधिमा ६ अर्ब १९ करोड रुपैयाँ मूल्यका सवारीसाधन भित्रिएका थिए भने त्यसबापत ५ अर्ब ९५ करोड रुपैयाँ राजस्व संकलन भएको थियो।
यस वर्ष आयात र राजस्व दुवैमा वृद्धि देखिएको कार्यालयको तथ्यांकले देखाउँछ।
भन्सार तथ्यांकअनुसार, तीन महिनामा सबैभन्दा बढी २४ हजार ९३९ वटा अनअसेम्बल मोटरसाइकल नेपाल भित्रिएका छन्।
ती मोटरसाइकलबाट मात्रै ३ अर्ब २८ करोड रुपैयाँ राजस्व उठेको छ।
त्यस्तै, ६२ करोड २४ लाख रुपैयाँ मूल्यका ३३० वटा पेट्रोल र डिजेलचालित जीप, कार र भ्यान आयात भएका छन्।
साथै २२९ वटा विद्युतीय जीप, कार र भ्यान पनि नेपाल भित्रिएका छन्, जसको मूल्य करिब ६८ करोड पाँच लाख रुपैयाँ बराबर छ।
विद्युतीय सवारीसाधनको प्रयोग बढ्दै गएको यस अवधिमा मात्र त्यसबापत ४५ करोड ७२ लाख रुपैयाँ राजस्व संकलन भएको छ।
गत वर्षको तुलनामा यो क्षेत्रको वृद्धि दर उल्लेख्य रहेको कार्यालयले जनाएको छ।
