वीरगन्ज । जिल्ला प्रहरी कार्यालय, बाराले अवैध पटाका बरामद गरेको छ । प्रहरीले वीरगन्जबाट काठमाडौँतर्फ जाँदै गरेको एक यात्रुबाहक बसबाट ठूलो परिमाणमा प्रतिबन्धित पटाका बरामद गरेको हो।
आज बिहान करिब ११:३० बजेको समयमा इलाका प्रहरी कार्यालय अमलेखगञ्जबाट प्रहरी नायव निरीक्षक धन प्रसाद श्रेष्ठको कमाण्डमा खटिएको चेकिङ टोलीले जीतपुर सिमरा उप-महानगरपालिका-२१, अमलेखगञ्जस्थित चेक प्वाइन्टमा सवारी साधन जाँच गरिरहेको थियो।
सोही क्रममा वीरगन्जबाट काठमाडौँतर्फ गइरहेको ना.६ ख. ६२९३ नम्बरको यात्रुबाहक बसलाई रोकेर चेकजाँच गर्दा बसको डिकी भित्र लुकाई-छिपाई राखिएको अवस्थामा विभिन्न किसिमका प्रतिबन्धित पटाका फेला परेको थियो।
बरामद गरिएको अवैध पटाकाको अनुमानित बजार मूल्य १ लाख ७ हजार रुपैयाँ रहेको प्रहरीले जनाएको छ। प्रहरीले प्रतिबन्धित पटाका नियन्त्रणमा लिएर आवश्यक कानुनी प्रक्रिया अगाडि बढाएको जिल्ला प्रहरी कार्यालय बाराले जानकारी दिएको छ।
खुला सीमाको फाइदा उठाउँदै चाडपर्वहरू नजिकिँदै गर्दा पटाका लगायतका प्रतिबन्धित वस्तुहरूको तस्करी बढ्ने सम्भावनालाई ध्यानमा राखी प्रहरीले सीमा नाका र मुख्य सडक खण्डमा चेकजाँचमा कडाइ गरेको छ। बरामद पटाका तस्करीमा संलग्न व्यक्तिहरू बारे थप अनुसन्धान भइरहेको प्रहरीले उल्लेख गरेको छ।
