वीरगन्ज। जेनजी आन्दोलनका घाइतेहरूले युवा नेता किरन केसीलाई शुशीला कार्कीको नेतृत्वमा रहेको अन्तरिम मन्त्रीमण्डलमा तत्काल समावेश गर्नुपर्ने माग राख्दै प्रधानमन्त्री तथा मन्त्रीपरिषद्को कार्यालयलाई औपचारिक पत्र बुझाएका छन् ।
आन्दोलनमा आफ्नो त्याग र बलिदानको सम्मानका लागि युवा नेतृत्वलाई प्रतिनिधित्व गराउनुपर्ने उनीहरूको भनाइ छ।२०७९ को प्रतिनिधि सभा निर्वाचनमा काठमाडौं क्षेत्र नं. ७ बाट स्वतन्त्र उम्मेदवारका रूपमा आफ्नो पहिचान बनाएका केसी भ्रष्टाचारविरुद्धको अडान र युवा सशक्तिकरणका पक्षधरका रूपमा चिनिन्छन् ।
घाइतेहरूले उठाएको यो मागलाई स्वतन्त्र नागरिक समाज नेपालले समेत बलियो समर्थन गरेको छ । नागरिक समाजले आन्दोलनको मर्म र भावनालाई बेवास्ता गर्नु भनेको यसको मूल्यको अपमान गर्नु सरह हुने चेतावनी दिएको छ ।
यद्यपि, शुशीला कार्की नेतृत्वको अन्तरिम सरकारले जनजाति, दलित र महिला लगायतका समुदायका प्रतिनिधिलाई समेटेको छ । तैपनि, युवा नेतृत्वको अभाव रहेको भन्दै सरकारको आलोचना भइरहेको सन्दर्भमा किरन केसीलाई मन्त्री बनाउने मागले अन्तरिम सरकारमाथि थप दबाब सिर्जना गरेको छ।
