सर्लाही । लगातारको अविरल वर्षाका कारण लखन्देही खोलामा आएको बाढीले बाँध कटान गरेपछि सर्लाहीको कौडेना गाउँपालिका वडा नम्बर ५, छपकैया लगायतका बस्तीहरू गम्भीर डुबानमा परेका छन् ।
लखन्देही खोलाको पानी बस्तीतर्फ सोझिएपछि छपकैयामा दर्जनौं घरहरूभित्र पानी पसेको र स्थानीय बासिन्दाहरू विस्थापित भएका छन् । बस्तीका सडकहरू जलमग्न भएका छन् भने पानीको सतह कम्मरसम्म पुगेको छ ।
डुबानबाट प्रभावित भएका परिवारहरूलाई सुरक्षित स्थानमा सार्ने तथा राहत वितरणका लागि स्थानीय प्रशासन र सुरक्षा निकायहरू सक्रिय भएका छन् । लखन्देही खोलामा पानीको बहाव उच्च रहेकाले बाँध कटानको जोखिम अझै बढ्न सक्ने भन्दै प्रशासनले नदी किनारका बस्तीहरूलाई उच्च सतर्कता अपनाउन आग्रह गरेको छ ।
