वीरगन्ज । नेकपा एमालेको दोस्रो विधान महाधिवेशन आजबाट ललितपुरको गोदावरीमा सुरु भएको छ। यो महाधिवेशनलाई एमालेले ‘महाउत्सव’को रूपमा मनाइरहेको छ र यसमा प्रविधि र अनुशासनको नौलो मिश्रण देखिएको छ।
पार्टीका अध्यक्ष तथा प्रधानमन्त्री केपी शर्मा ओलीलाई ‘एकल द्वार’बाट प्रवेश गराउने विशेष व्यवस्था गरिएको छ भने अन्य प्रतिनिधिहरूलाई क्यूआर कोड स्क्यान गरेर मात्र प्रवेश दिइएको छ।
गोदावरीस्थित सनराइज सम्मेलन केन्द्रमा आयोजित यस महाधिवेशनमा देशभरबाट २,३०० भन्दा बढी प्रतिनिधिहरू सहभागी भएका छन्। महाधिवेशन स्थलमा प्रवेश गर्न प्रतिनिधिहरूले ‘क्यूआर कोड’ अनिवार्य स्क्यान गर्नुपर्छ। यो प्रविधिले अनाधिकृत प्रवेश रोक्नुका साथै उपस्थितिको डेटा पनि संकलन गर्ने व्यवस्था गरिएको छ। यो व्यवस्थालाई पार्टीको प्रचार कमिटीले डिजिटल रूपमा व्यवस्थित गरेको छ।
महाधिवेशनको अर्को रोचक पक्ष ‘प्रवेशद्वार’ को व्यवस्थापन हो। सम्मेलन केन्द्रमा चारवटा प्रवेशद्वार बनाइएको छ। जसमध्ये, एक नम्बर गेटबाट प्रधानमन्त्री तथा पार्टी अध्यक्ष केपी शर्मा ओलीलाई मात्र प्रवेश गराइनेछ। यो विशेष व्यवस्थाले ओलीलाई महाधिवेशनको केन्द्रबिन्दुमा राख्ने एमालेको रणनीति स्पष्ट देखिन्छ। अन्य पदाधिकारी, मन्त्री, मुख्यमन्त्री र प्रतिनिधिहरूले दोस्रो र तेस्रो गेट प्रयोग गर्नुपर्नेछ। चौथो गेट भने क्याटरिङ सेवाका लागि छुट्याइएको छ।
महाधिवेशनको उद्घाटन सत्रपछि पार्टीका नेताहरूले विभिन्न प्रतिवेदनहरू प्रस्तुत गर्नेछन्। अध्यक्ष ओलीले राजनीतिक प्रतिवेदन, उपाध्यक्ष विष्णु पौडेलले विधान संशोधन प्रस्ताव र महासचिव शंकर पोखरेलले संगठनात्मक प्रतिवेदन प्रस्तुत गर्नेछन्। यसबाहेक, स्थायी कमिटी सदस्य कर्ण थापाले फरक मत प्रस्तुत गर्ने भएकाले महाधिवेशन थप रोचक बनेको छ।
भदौ २१ गते प्रतिवेदनहरूमाथि समूहगत छलफल हुनेछ र २२ गते त्यसका निष्कर्षहरू प्रस्तुत गरिनेछ। प्रतिनिधिहरूको सुझाव र जिज्ञासामा नेताहरूले जवाफ दिएपछि महाधिवेशन समापन हुनेछ।
