वीरगन्ज । सरकारमा जनता समाजवादी पार्टीबाट प्रतिनिधित्व गरिरहेका प्रदीप यादवलाई उनको पार्टीले फिर्ता बोलाउने निर्णय गरेको छ।
अशोक राई नेतृत्वको जनता समाजवादी पार्टीको बैठकले गरेको यस निर्णयसँगै यादवले मन्त्री पदबाट राजीनामा दिनुपर्ने भएको छ।
पार्टीका उपाध्यक्ष परशुराम बस्नेतका अनुसार, पार्टीले प्रदीप यादव र नवलकिशोर साहलाई फिर्ता बोलाएर उनीहरूको स्थानमा डा. वीरेन्द्र महतो र रञ्जु झालाई मन्त्री बनाउने निर्णय गरेको छ। बस्नेतले भदौ ११ गतेभित्र दुवैजना मन्त्रीले राजीनामा दिने र त्यसपछि नयाँ मन्त्रीहरूको शपथग्रहण हुने बताएका छन्।
पार्टीको यो निर्णयले प्रदीप यादवको मन्त्री पदको यात्रा एक वर्षभन्दा बढी समयपछि समाप्त हुँदैछ। सरकार गठनको समयमा उनलाई एक वर्षका लागि मात्र मन्त्री बनाइएको थियो। उनले यसअघि वन तथा वातावरण मन्त्रीको रूपमा काम गरिसकेका छन्।
नयाँ मन्त्री बन्ने दौडमा रहेका डा. वीरेन्द्र महतो यसअघि उपेन्द्र यादव नेतृत्वको पार्टीबाट वनमन्त्री भइसकेका छन्। त्यस्तै, रञ्जु झाले पनि विना विभागीय मन्त्रीको प्रस्ताव अस्वीकार गर्दै एक वर्ष कुर्न तयार भएकी थिइन्, र अहिले उनको नाम मन्त्री पदका लागि सिफारिस भएको छ।
