वीरगन्ज । पर्साको ठोरी गाउँपालिका–४ को मालीबस्ती नजिकै, भारततर्फ जाने बाटोमा एउटा पाटेबाघ मृत अवस्थामा भेटिएको छ।
यो घटनाले स्थानीय र वन्यजन्तु संरक्षणकर्मीहरूलाई चिन्तित बनाएको छ। पर्सा प्रहरीका सूचना अधिकारी किशोर लम्सालका अनुसार, आज बिहान ७ः३० बजेतिर स्थानीयहरूले बाघ मृत भेटिएको जानकारी दिएका थिए। लगत्तै, प्रहरी चौकी विजयबस्तीबाट प्रहरीको टोली घटनास्थलमा पुगेर अनुसन्धान सुरु गरेको छ। यस घटनाको थप जानकारीका लागि पर्सा राष्ट्रिय निकुञ्ज र नेपाली सबुज गणको टोली पनि घटनास्थलमा खटिएको छ।
मृत अवस्थामा भेटिएको बाघको मुचुल्का उठाएर शव परीक्षणका लागि पर्सा राष्ट्रिय निकुञ्जमा ल्याइएको छ। निकुञ्जका रेन्जर जयराम न्यौपानेले बाघको बाहिरी भागमा सामान्य चोटपटक देखिएको बताएका छन्। ‘बाघ जुँधेर चोट लागेको हो वा अरू कुनै कारणले, त्यो अहिले भन्न सकिँदैन। शव परीक्षणको रिपोर्ट आएपछि मात्रै यस विषयमा थप जानकारी प्राप्त हुनेछ,’ उनले भने।
यस घटनाले उक्त क्षेत्रमा रहेका वन्यजन्तुको सुरक्षा र मानव–वन्यजन्तु द्वन्द्वका विषयमा नयाँ बहस सिर्जना गरेको छ।
