वीरगन्ज । लामो समयदेखिको चर्को खडेरी र जल संकटको सामना गरिरहेका वीरगन्ज र आसपासका क्षेत्रमा अन्ततः वर्षा भएको छ।
मनसुन सक्रिय भई वीरगन्जको आसपास क्षेत्रमा पानी परिरहेकाले खानेपानी र सिँचाइको चरम अभाव झेल्दै आएका स्थानीय बासिन्दा तथा किसानहरूले ठूलो राहतको सास फेरेका छन्।
पछिल्लो समय वीरगन्जसहित समग्र पर्सा जिल्ला ‘काकाकुल’ को अवस्थामा पुगेको थियो। भीषण गर्मीका कारण चापकाल, इनार, दमकल र डिपबोरिङका मुहानहरू सुकेका थिए, जसले गर्दा खानेपानीको हाहाकार मच्चिएको थियो। बालबालिका, ज्येष्ठ नागरिक र बिरामीहरू सबैभन्दा बढी प्रभावित बनेका थिए।
यसका साथै, धान रोप्ने मुख्य समयमा पर्याप्त वर्षा नहुँदा किसानहरूले खेती गर्न पाएका थिएनन्। रोपाइँको काम ठप्पजस्तै बनेको थियो भने कतिपय स्थानमा रोपेका बिरुवाहरू पनि पानी अभावले सुक्न थालेका थिए। यसले कृषिमा आधारित यस क्षेत्रको अर्थतन्त्रमा गम्भीर असर पर्ने चिन्ता बढेको थियो।
पानी परेपछि भूमिगत जलस्तरमा केही सुधार आउने अपेक्षा गरिएको छ। यसले गर्दा चापाकल र इनारहरूमा पानीको मात्रा बढ्न सक्नेछ र खानेपानीको अभाव केही हदसम्म कम हुनेछ। महानगरपालिकाले ट्याङ्करबाट पानी वितरण गरेर अस्थायी समाधान दिए पनि, प्राकृतिक वर्षाले दीर्घकालीन समाधानमा मद्दत पुग्नेछ। किसानहरूले वर्षापछि धान रोपाइँ गर्न पाउने छन्। रोप्न बाँकी खेतमा पनि काम अगाडि बढाउन सहज भएको छ।
यद्यपि, यो वर्षाले तत्कालको राहत दिए पनि, दीर्घकालीन समाधानका लागि अझै धेरै काम गर्नुपर्ने आवश्यकता छ। जलवायु परिवर्तन र जलस्रोत व्यवस्थापनको चुनौतीलाई सम्बोधन गर्न वीरगन्ज महानगरपालिका र जिल्ला प्रशासन कार्यालय पर्साले विभिन्न पहलहरू गरिरहेका छन्। हालै डिपबोरिङ जडानमा विपद् व्यवस्थापन समितिको अनुमति अनिवार्य गरिनु र खानेपानी तथा सिँचाइ समस्या समाधानका लागि ९ सदस्यीय समिति गठन गरिनु यसैका उदाहरण हुन्।
अहिलेका लागि भने, लामो खडेरीबाट त्रासित वीरगन्ज र पर्साका बासिन्दाले वर्षाको स्वागत गरेका छन् र यसले ल्याएको राहतको अनुभव गरिरहेका छन्।
