वीरगन्ज। राष्ट्रिय प्रजातन्त्र पार्टी (राप्रपा) का उपाध्यक्ष रविन्द्र मिश्र र सांसद धवलशमशेर राणा विरुद्ध काठमाडौँ जिल्ला अदालतले पक्राउ पुर्जी जारी गर्ने तयारी गरेको छ।
चैत १५ गते तीनकुनेमा भएको राजावादीको हिंसात्मक प्रदर्शनमा संलग्न रहेको आरोपमा हाजिरी जमानीमा छुटेका यी दुई नेता त्यसयता अदालतमा बयानका लागि उपस्थित नभएपछि यस्तो कदम चालिएको हो।
अदालत स्रोतका अनुसार, मिश्र र राणा सम्पर्कविहीन भएपछि उनीहरूलाई जमानीमा राख्ने तीन जना कानुन व्यवसायी र एक जना स्वकीय सचिवलाई यसअघि नै जनही २५/२५ हजार रुपैयाँ जरिवाना तिराइएको थियो।
स्रोतका अनुसार, अदालतको आदेशमा ‘अनुपस्थित रहेका र फरार प्रतिवादीहरूको हकमा कानुन बमोजिमको पक्राउ पुर्जी जारी गर्नु’ भनिएको थियो। यद्यपि, अभियोग दर्ता र थुनछेकको प्रक्रियामा अदालत व्यस्त रहेका कारण पुर्जी जारी हुन केही ढिलाइ भएको बताइएको छ। तर, अब भने फाँटले पुर्जी जारी गर्ने प्रक्रिया अगाडि बढाइसकेको छ।
यो घटनाक्रमले राप्रपाको राजनीतिमा तरंग पैदा गरेको छ, किनकि पार्टीका दुई महत्वपूर्ण नेताहरूलाई हिंसात्मक प्रदर्शनसँग जोडेर पक्राउ पुर्जी जारी हुन लागेको हो। यसले उनीहरूको राजनीतिक भविष्यमा समेत असर पार्न सक्ने आकलन गरिएको छ।
