वीरगन्ज ।
नेपाल प्रेस युनियनले आफ्नो ३४ औँ स्थापना दिवस जेठ १२ गतेदेखि १९ गतेसम्म साताव्यापी रूपमा मनाउने भएको छ। प्रेस युनियनका अध्यक्ष शिव लम्सालको अध्यक्षतामा बसेको सचिवालय बैठकले विभिन्न कार्यक्रमको आयोजना गरी दिवस मनाउने निर्णय गरेको हो।
यस अवसरमा पत्रकारको स्वास्थ्य परीक्षण, रक्तदान कार्यक्रम, र लोकतन्त्रमा प्रेसको भूमिका विषयक विचार गोष्ठी जस्ता महत्त्वपूर्ण कार्यक्रमहरू गरिनेछन्। स्थापना दिवसको मुख्य दिन दीप प्रज्वलन, अस्पतालका बिरामीलाई फलफूल वितरण, पत्रकारलाई पुरस्कार वितरण, र पत्रकार तथा सरोकारवालासँग मैत्रीपूर्ण खेलकुद लगायतका कार्यक्रम पनि आयोजना गरिने युनियनका महासचिव दिलीप पौडेलले जानकारी दिए। महासचिव पौडेलका अनुसार, प्रदेश र सबै शाखाहरूलाई यी कार्यक्रमहरू आयोजना गर्न निर्देशन दिइएको छ।
लोकतन्त्रप्रति आस्था राख्ने श्रमजीवी पत्रकारहरूको छाता संस्थाका रूपमा २०४८ जेठ १३ गते स्थापना भएको नेपाल प्रेस युनियनले पत्रकारको हक, हित, पेसागत सुरक्षा, ट्रेड युनियन अधिकार, र क्षमता विकासका लागि निरन्तर काम गर्दै आएको छ। यसका अतिरिक्त, प्रेस युनियनले प्रेस मैत्री कानुन निर्माण, प्रेस तथा अभिव्यक्ति स्वतन्त्रताको रक्षा, र सञ्चार संस्थाको सबलीकरण तथा सुदृढीकरणका लागि नीतिगत पहलहरू गर्दै आएको छ। हालै मात्र, युनियनले वैशाखको अन्तिम साता लोमन्थाङ अन्तर्राष्ट्रिय मिडिया समिट पनि सफलतापूर्वक सम्पन्न गरेको थियो।
