काठमाडौँ । प्यालेष्टिनी राष्ट्रपति महमुद अब्बासले पश्चिम किनार र गाजामा रक्तपात रोक्न इजरायललाई हतियार रोक्न अमेरिकासँग आह्वान गरेका छन्।
संयुक्त राष्ट्रसंघीय महासभालाई सम्बोधन गर्दै उनले गाजामा मृत्यु हुनेको सङ्ख्या बढिरहे पनि वासिङ्टनले इजरायललाई त्यहाँको युद्धका लागि कूटनीतिक समर्थन र हतियार प्रदान गरिरहेको आरोप लगाए।
‘यो अपराध रोक्नुहोस्, अहिले नै रोक्नुहोस्। बालबालिका र महिलाहरूको हत्या रोक्नुहोस्। नरसंहार रोक्नुहोस्’, अब्बासले भने, ‘इजरायललाई हतियार पठाउन रोक्नुहोस्। यो पागलपन जारी रहन सक्दैन। गाजा र पश्चिम किनारमा हाम्रा मानिसहरूमाथि भइरहेको कुराका लागि सम्पूर्ण विश्व जिम्मेवार छ।’ उनले इजरायल संयुक्त राष्ट्रसंघमा रहन ‘योग्य नरहेको बताए।
वासिङ्टन इजरायलको सबैभन्दा निकट सहयोगी र समर्थक हो। अमेरिकाले इजरायललाई अर्बौँ डलरको सहायता र सैन्य सामग्री आपूर्ति गर्छ।
हमास नियन्त्रित क्षेत्रको स्वास्थ्य मन्त्रालयका अनुसार गाजामा ज्यान गुमाउनेको सङ्ख्या ४१ हजार ५३४ पुगेको छ। हमासको अक्टोबर ७ को इजरायलमाथिको आक्रमणबाट शुरु भएको युद्धका कारण घेराबन्दीमा परेको गाजापट्टीका २४ लाख मानिसमध्ये अधिकांश कम्तीमा एक पटक युद्धबाट विस्थापित भएका छन् र धेरैले विद्यालय भवनमा आश्रय लिएका छन्।
