रौतहट । जिल्ला ट्राफिक प्रहरी कार्यालय चन्द्रनिगाहपुर तथा मातहतका युनिटहरूले ९ महिनाको अवधिमा कारबाहीबाट १ करोड रुपैयाँ बढी राजश्व सङ्कलन गरेको छ । नियम विपरीत चलेका सवारी साधनलाई गरेको कारबाहीबाट १ करोड ७ लाख ४६ हजार रुपैयाँ राजश्व सङ्कलन गरेको छ ।
गत साउन महिना देखी चैत मसान्तसम्म रौतहट जिल्लामा नियम विपरीत चलेका ११ हजार ४८९ सवारी साधनलाई गरिएको कारबाहीबाट उक्त रकम बराबर राजश्व सङ्कलन भएको जिल्ला ट्राफिक प्रहरी प्रमुख इन्स्पेक्टर लोकेन्द्र अधिकारीले जानकारी दिए ।
९ महिनाको अवधिमा जिल्ला भरीमा भएको ५४९ सवारी दुर्घटनामा ३८ जना मानिसको मृत्यु भएको छ । उक्त दुर्घटनामा ६६ जना मानिस गम्भीर तथा ८३६ जना सामान्य घाइते भएको ट्राफिक प्रहरीको सूचनामा उल्लेख गरिएको छ ।
ट्राफिक प्रहरीले सोही अवधिमा बढ्दो सवारी दुर्घटना न्यूनीकरण गर्न विद्यालय, बाटो, सार्वजनिक स्थलमा गरी दुई हजार ३९९ सचेतना मूलक कार्यक्रम आयोजना गरेको जसमा ५३ हजार ९३६ जना मानिस सहभागी भएको जिल्ला ट्राफिक प्रहरी कार्यालय चन्द्रिगाहपुरले जनाएको छ ।
कम जनशक्तिको बाबजुद जिल्लाको मुख्य पूर्व पश्चिम राजमार्गको बागमती, चन्द्रनिगाहपुर, गौर चन्द्रपुर सडकखण्ड अन्तर्गत दुमारिया, गरुडा, शिवनगर, सुकदेव चौक, बमनहर, गौर र ग्रामीण क्षेत्रमा समेत ट्राफिक प्रहरी परिचालन गरिएको जनाइएको छ ।
