सर्लाही । सर्लाही प्रहरीले आज बिल बिजक शंकास्पद रहेको कबाड सामग्री बोकेको एउटा ट्रक नियन्त्रणमा लिएको छ।
जिल्ला प्रहरी कार्यालय सर्लाहीबाट खटिएको टोलीले सर्लाही–बागमती नगरपालिका वडा नम्बर – ११ को पूर्व–पश्चिम लोकमार्ग अन्तर्गत खण्डमा जाँचको क्रममा उक्त ट्रक नियन्त्रणमा लिएको हो ।
सर्लाहीबाट बिनौलीतर्फ गइरहेको ना ६ ख ७८५४ नम्बरको ट्रकलाई रोक्दा ट्रकमा लोड सामानको बिल तथा कागजात शंकास्पद पाइएपछि उक्त ट्रक नियन्त्रणमा लिइएको सर्लाही प्रहरी प्रवक्ता सरोज राइले बताए ।
उनका अनुसार ट्रकमा करिब १२ लाख ५६ हजार ५ सय रुपैयाँ बराबरको कबाड सामग्री लोड गरिएको अनुमान गरिएको छ ।
ट्रक तथा सामान आवश्यक अनुसन्धानका लागि राजस्व अनुसन्धान कार्यालय, पथलैयामा पठाइएको प्रहरी प्रवक्ता राईले जानकारी दिएका छन्।
