वीरगन्ज । प्रहरीको केन्द्रीय अनुसन्धान ब्युरो (सिआइबी) ले १७ वर्षदेखि फरार एकजना पुजारी अभियुक्तलाई पर्साबाट पक्राउ गरेको छ ।
१७ वर्षअघि विन्दवासिनीमा भएको हत्यामा संलग्न भइ फरार रहेका पुजारी अभियुक्तलाई सिआइबीले पर्साबाट पक्राउ गरेको जानकारी दिएको छ ।
प्रहरीको टोलीले विन्दबासिनी गाउँपालिका– २ घर भएका ६२ वर्षीय लोकनाथ साह तेलीलाई साधुको पहिरनमा पक्राउ गरेको जनाएको छ ।
उनलाई सोमबार पक्राउ गरिएको सिआइबीले जारी गरेको प्रेस विज्ञप्तिमा लेखिएको छ । प्रहरीका अनुसार उनी पक्राउ पर्दा पुजारीका रुपमा भेटिएका हुन ।
२५ वैशाख ०६४ मा पर्साको साविक बहुअर्वाभाडा– ५ बस्ने ढोडा मुखिया विनको हत्याको अभियोगमा अदालतले उनीमाथि सर्वस्वसहित जन्मकैद सजायको फैसला गरेको थियो ।
त्यसबेलादेखि उनी फरार रहेको पाइएको प्रहरीले जारी गरेको विज्ञप्तिमा भनेको छ । प्रहरीका अनुसार जग्गाको विवादमा छलफलमा बोलाएर गोली हानी हत्या गरिएको थियो ।
फरार तेली भारतको चम्पारण पिपरियामा रहेको रामजानकारी मन्दिरमा पुजारीको रूपमा बस्दै आएको प्रहरी अनुसन्धानबाट खुलेको छ ।
अदालतको फैसला कार्यान्वयनका लागि तेलीलाई जिल्ला अदालत पर्सा पेस गरिएपछि उनलाइ कारागार चलानसमेत गरिएको जनाइएको छ ।
